ნათია თურნავა - გორის რაიონში, სოფელ ნიგოზას მიმდებარედ 50-მეგავატიანი ქარის ელექტროსადგური აშენდება

გორის რაიონში, სოფელ ნიგოზას მიმდებარედ 50- მეგავატიანი ქარის ელექტროსადგური აშენდება.

როგორც მთავრობის სხდომის დასრულების შემდეგ ეკონომიკისა და მდგრადი განვითარების მინისტრმა ნათია თურნავამ განაცხადა, ახალი ქარის ელექტროსადგური დამატებით 200 მილიონი კილოვატ საათის გამომუშავებას შეძლებს.

„დღეს დავამტკიცეთ სხდომაზე ახალი ქარის ელექტროსადგურის განვითარების და მშენებლობის კონცეფცია. 50- მეგავატიანი ელექტროსადგური, რომელიც უნდა აშენდეს გორის რაიონში სოფელ ნიგოზას მიმდებარედ, არის დამატებით დაახლოებით 200 მილიონი კილოვატ საათის გამომუშავება. ეს არის ძალიან მნიშვნელოვანი პროექტი არამარტო იმიტომ, რომ ადგილობრივ რესურსზე დამყარებული ელექტროენერგია იქნება, არამედ იმიტომ, რომ კიდევ ერთი ნაბიჯი გადავდგით უფრო მწვანე დივერსიფიცირებული, განახლებადი ენერგოსექტორის დამკვიდრებისკენ. ენერგოსექტორის განახლებადი ნაწილი არის დღეს ძირითადად ჰიდროსადგურებით წარმოდგენილი, თუმცა თანამედროვე სამყაროში უნდა იყოს დივერსიფიცირება და ვისწრაფვით განვავითაროთ ქარისა და მზის ენერგია. კიდევ რამდენიმე პროექტი გამზადებული გვაქვს და თანმიმდევრულად წარმოვადგენთ მთავრობაზე“, - განაცხადა თურნავამ.

კითხვაზე, ჰიდრო თუ ქარის ელექტროსადგურების პროექტები ხშირად სხვადასხვა მიზეზის გამო არ ხორციელდებოდა და რა აძლევს იმის თქმის საფუძველს, რომ კონკრეტულად ეს პროექტი განხორციელდება და წარმატებული იქნება, თურნავამ რამდენიმე მიზეზი ჩამოთვალა.

„მე დარწმუნებული ვარ, რომ ეს, „ნიგოზას“ პროექტი წარმატებით განვითარდება და ამის თქმის საფუძველს რამდენიმე ფაქტორი მაძლევს. პირველი, რომ ეს არის ძალიან მნიშვნელოვანი ჩვენი ქვეყნისთვის და აღარ გვაქვს ფუფუნება, ძალიან ხანგრძლივად გაიწელოს ნებისმიერი განახლებადი ენერგიის პროექტი, რადგან იცით, რომ მოთხოვნა იმატებს, დეფიციტი იმატებს, იმპორტი იმატებს და ჩვენ ყველა ღონე უნდა ვიხმაროთ, რათა ჰიდრო იქნება თუ ქარის, ძალიან სწრაფად განვავითაროთ. მეორე ფაქტორია, რომ ეს არის სწორედ ქარი და არა ჰიდრო, ჩვენ დამატებით ვართ დაინტერესებულები, რომ განახლებადი ენერგია ჩვენთან არა მხოლოდ ჰიდრო სადგურებით იყოს წარმოდგენილი, არამედ ქარითაც და მზითაც და ჩვენი ამბიციაა, რომ დავაჩქაროთ ეს პროექტები. აქ სერიოზული დაინტერესებული ინვესტორი არსებობს, ვინც კვლევებში იყო ჩართული და ეს არის თურქული კომპანია „ჩალიკი“, ვისთანაც წარიმართება უკვე მოლაპარაკებები ამ ფონზე და აქედან გამომდინარე ყველა ეს ფაქტორი ერთობლიობაში მაძლევს რწმენას, რომ ეს პროექტი ძალიან სწრაფად აშენდება“, - განაცხადა თურნავამ.