რა შეიძლება შეიცვალოს 2020 წლიდან თბილისის სატრანსპორტო პოლიტიკაში
გერმანული კომპანიის - „გოპა“ სპეციალისტებმა თბილისის მერიის, საჯარო უწყებებისა და სატრანსპორტო კომპანიების წარმომადგენლებს თბილისში „ჭკვიანი სატრანსპორტო სისტემების“ განვითარების მიმართულებები გააცნეს.
მერიის ტრანსპორტის საქალაქო სამსახურის ცნობით, 2020 წლიდან მერია სატრანსპორტო ნაკადების მართვის კომპლექსურ პლატფორმას ქმნის. იგი ხელს შეუწყობს ტრანსპორტის მენეჯმენტის დახვეწას, გზებზე ტრანსპორტის გამტარიანობის გაზრდასა და საცობების შემცირებას.
გეგმის თანახმად, 2020 წლიდან განიხილება შუქნიშნების უკვე არსებული ინფრასტრუქტურის ოპტიმიზაცია და ტექნიკური აღჭურვა:
- შუქნიშნების მართვის ცენტრის მოდერნიზაცია;
- შუქნიშნების ერთმანეთთან სინქრონიზაცია და მართვის ცენტრთან კავშირი;
- საზოგადოებრივი ტრანსპორტის პრიორიტეტული მოძრაობის სისტემის დანერგვა;
- შუქნიშნების მაგისტრალებზე ე.წ „მწვანე ტალღების“ შექმნა;
- სხვადასხვა უწყებებში თავმოყრილი სატრანსპორტო სისტემების ერთიან ქსელში ინტეგრირება;
- შუქნიშნებისა და არარეგულირებადი გზაჯვარედინების ტრანსპორტის აღმრიცხველი და გამონაბოლქვის დეტექტორებით აღჭურვა;
- ქუჩებში ცვლადი საინფორმაციო ნიშნების ელექტრონული ტაბლოების მონტაჟი.
„აღსანიშნავია, რომ პარალელურად, საერთაშორისო ფონდების დაფინანსებით ფრანგული კომპანია „სისტრა“ ამუშავებს თბილისის საზოგადოებრივი ტრანსპორტის ახალ სამარშრუტო სქემას, ხოლო დანიური კომპანია „რამბოლი“ - „მდგრადი ურბანული მობილობის გეგმას“. ეს უკანასკნელი მთავარი სატრანსპორტო დოკუმენტია. იგი მოიცავს ყველა ძირითად მიმართულებას: საფეხმავლო და საველოსიპედო ინფრასტრუქტურის, საზოგადოებრივი ტრანსპორტის (მეტრო, ავტობუსი, რკინიგზა, საბაგირო) განვითარების გეგმებს, პარკირების ზონებისა და კერძო ტრანსპორტის ნაკადების მართვის სტრატეგიას,“-ნათქვამია ტრანსპორტის სამსახურის მიერ გავრცელებულ ინფორმაციაში.
