ნათია თურნავა ბათუმის პორტის შესაძლო გაყიდვის შესახებ გავრცელებულ ინფორმაციას არასწორს უწოდებს
საქართველოს ეკონომიკისა და მდგრადი განვითარების მინისტრი ნათია თურნავა უარყოფს გავრცელებულ ინფორმაციას, რომ ბათუმის პორტი შესაძლოა გაიყიდოს. როგორც თურნავამ ჟურნალისტებს მთავრობის სხდომის დასრულების შემდეგ განუცხადა, ბათუმის პორტი ოპერირებაში აქვს ყაზახურ კომპანიას, ხოლო ეკონომიკის სამინისტრო არ ფლობს ინფორმაციას პორტით სომხური მხარის დაინტერესების შესახებ.
„ეს ინფორმაცია აბსოლუტურად არაზუსტია. ჯერ ერთი, ბათუმის პორტი დიდი ხანია ოპერირებაში აქვს გადაცემული ყაზახურ კომპანიას, რომელიც ამუშავებს ამ პორტს.
ჩვენთვის მსგავსი ინფორმაცია, რომ სომხურ მხარეს რამე ინტერესი გამოეხატა, ცნობილი არ არის. თუკი, ასეთი რამე სინამდვილეში არსებობდა, ჩვენთვის იქნებოდა ცნობილი. დღეს სახელმწიფოს ეს ობიექტი არ ეკუთვნის და გასაყიდად ვერ გამოვიტანდით“, - განაცხადა ნათია თურნავამ.
შეგახსენებთ, რომ სომხეთის საზოგადოებრივი რადიო სომხურ გამოცემა „ჟამანაკზე“ დაყრდნობით წერს, რომ სომხეთი ბათუმის საზღვაო პორტის შესყიდვით არის დაინტერესებული, რომელსაც საქართველოს ხელისუფლება 600 მილიონ აშშ დოლარად ყიდის.