"პროგრამას „აწარმოე საქართველოში“ რამდენიმე ახალი პრიორიტეტული მიმართულება, მათ შორის საზღვაო თევზჭერის ინდუსტრია დავამატეთ"

მთავრობის სხდომამ დღეს პროგრამა განახლებული სახით დაამტკიცა და პროგრამას „აწარმოე საქართველოში“ ახალი მიმართულებები დაემატა. ეკონომიკისა და მდგრადი განვითარების მინისტრმა მედიას ის სექტორები გააცნო, რომლებზეც პროგრამა იქნება ორიენტირებული, მათ შორისაა საზღვაო თევზჭერის ინდუსტრია.

ნათია თურნავას განცხადებით, საქართველოში საზღვაო თევზჭერის ინდუსტრია ერთ-ერთი მნიშვნელოვანი, პრიორიტეტული დარგია, რომელსაც უკვე პროგრამა „აწარმოე საქართველოში“ თანადაფინანსებას გაუწევს და განვითარებაში დაეხმარება.

ეკონომიკის მინისტრის ინფორმაციით, საქართველოში დღეს დაახლოებით 30-მდე თევზსაჭერი გემი (სეინერი) არსებობს, რომლებზეც 500-მდე ქართველი მეზღვაურია დასაქმებული. თუმცა, გემები უკვე ძველია და ვერ აკმაყოფილებს თანამედროვე მოთხოვნებს, 8 გემს კი სტატუსი აქვს შეჩერებული.

„ეს გემები ძალიან მოძველებულია, წლიდან წლამდე მათი ტექნიკური მდგომარეობა უარესდება. ეს, რა თქმა უნდა, პრობლემას უქმნის დარგს, თევზჭერაში დასაქმებულ ადამიანებს, აქედან გამომდინარე, გადავწყვიტეთ, რომ ეს იქნება ახალი სფერო, ახალი დარგი, რომელსაც ჩვენი პროგრამა გაუწევს დახმარებას“, - აღნიშნა ნათია თურნავამ.

ეკონომიკისა და მდგრაგი განვითარების სამინისტოს ინფორმაციით, „აწარმოე საქართველოში“ პროგრამაში შესული ცვლილებები ითვალისწინებს სესხის თანადაფინანსებას 2 - წლიანი ვადით. გემის ლიზინგის ღირებულების ჩარჩოები 100,000 ლარიდან 5 მლნ ლარამდე იქნება, ხოლო სესხის მოცულობა 150,000 ლარიდან 5 მლნ ლარამდე. შედეგად, ადგილობრივი მეთევზეები შეძლებენ თანამედროვე სტანდარტის თევზსაჭერი გემების შეძენას. მთავრობის ინიციატივა „აწარმოე საქართველოში“ თევზჭერის მიმართულების დამატების შესახებ ხელს შეუწყობს ამ დარგის განვითარებას და თევზმჭერი ფლოტის მნიშვნელოვან განახლებას და დარგში თანამედროვე ტექნოლოგიების დანერგვას, რაც შედეგად თევზჭერის პროდუქტების ასორტიმენტისა და გაყიდვების გეოგრაფიის მნიშვნელოვან ზრდას და ახალი სამუშაო ადგილების შექმნას მოიტანს.

იმ ახალ მიმართულებებს შორის, რომლებიც პროგრამას „აწარმოე საქართველოში“ დაემატა, ასევე შედის: ბალნეოლოგიური კურორტების კომპონენტი; ტურისტული სერვისები, როგორიცაა თემატური პარკები (მაგალითად, ეთნოგრაფიული პარკები და სხვ) და სათავგადასავლო ტურიზმი; კერამიკის წარმოება.