"მესამე კვარტალში მოსალოდნელზე მაღალი ეკონომიკური ზრდა დაფიქსირდა"

ექსპორტი მიმდინარე წლის ნოემბერში 25 პროცენტით გაიზარდა, ეკონომიკური ზრდა მესამე კვარტალში კი იმაზე მაღალია, ვიდრე ველოდით. ექსპორტი კვლავაც რჩება ჩვენი ეკონომიკური ზრდის გამწევ ძალად, - განაცხადა ეკონომიკისა და მდგრადი განვითარების მინისტრმა ნათია თურნავამ მთავრობის ადმინისტრაციაში გამართულ ბრიფინგზე.

ეკონომიკისა და მდგრადი განვითარების მინისტრმა ქვეყნის წინაშე დღეს არსებულ გამოწვევებზეც ისაუბრა.

„ჩვენი მთავრობა, ეკონომიკური გუნდი, ჩვენი სამინისტრო ყველაფერს ვაკეთებთ იმისთვის, რომ არევისა და დესტაბილიტაციის მცდელობებმა ჩვენი მოსახლეობის ცხოვრებაზე ნაკლები გავლენა იქონიოს, განვითარდეს ეკონომიკა, განვითარდეს ბიზნესი, შეიქმნას ახალი სამუშაო ადგილები და ჩვენი გეგმების მიხედვით მოსახლეობის უფრო მეტ კეთილდღეობას მივაღწიოთ“, - განაცხადა თურნავამ.

ცნობისთვის, „საქსტატის“ მონაცემებით, ეკონომიკურმა ზრდამ 2019 წლის მესამე კვარტალში 5.8 პროცენტი შეადგინა, ხოლო იანვარ-სექტემბრის პერიოდში ეკონომიკური ზრდა 5.2 პროცენტს გაუტოლდა. კვარტალური კვლევის მიხედვით, 2019 წლის მესამე კვარტლის ეკონომიკური ზრდა 0.1 პროცენტული პუნქტით ზრდის მიმართულებით დაზუსტდა.