„საზღვაო ტრანსპორტის სფეროს განვითარება დასაქმების შესაძლებლობებს გაზრდის"

ეკონომიკისა და მდგრადი განვითარების მინისტრმა ნათია თურნავამ საქართველოს საზღვაო ტრანსპორტის სააგენტოს წლიური ანგარიში და სამომავლო გეგმების შესახებ ინფორმაცია მოისმინა. პრეზენტაცია სააგენტოს დირექტორმა თამარ იოსელიანმა წარადგინა. ამის შესახებ ეკონომიკისა და მდგრადი განვითარების სამინისტროდან იუწყებიან.

ღონისძიებას ასევე დაესწრო მინისტრის მოადგილე აკაკი საღირაშვილი.

მათი ინფორმაციით, სააგენტოს დირექტორმა განსაკუთრებული ყურადღება გაამახვილა როგორც დარგის ინსტიტუციურ განვითარებასა და საერთაშორისო აღიარებაზე, ასევე მეზღვაურთა განათლების სისტემის დახვეწასა და დასაქმების ხელშეწყობაზე. თამარ იოსელიანმა პრეზენტაციაზე აღინიშნა, რომ სააგენტოს ინიციატივით, მიმდინარე წელს მეზღვაურთა დასაქმების ხელშეწყობისთვის შექმნილი სპეციალური ვებ-პორტალი ამოქმედდა, რომელიც მეზღვაურებსა და დამსაქმებლებს შორის პირდაპირ კომუნიკაციას უზრუნველყოფს. თამარ იოსელიანის განცხადებით, ქართველი მეზღვაურები, მათი მაღალი პროფესიონალიზმიდან გამომდინარე, საკმაოდ მოთხოვნადი არიან საერთაშორისო ბაზარზე. მისი თქმით, ამას მოწმობს ქართველი მეზღვაურების დასაქმების მაჩვენებელი.

„წელს ხელი მოეწერა მეზღვაურთა სერტიფიკატების ურთიერთაღიარების მემორანდუმს 2 საზღვაო ქვეყანასთან: ბრაზილიასთან და ქუვეითთან, ხოლო ავსტრალიასთან, დიდ ბრიტანეთთან, საუდის არაბეთსა და კატართან შედგა შეთანხმება, რომ შესაბამისი შინაარსის მემორანდუმებს 2020 წლის დასაწყისში მოეწერება ხელი. დღეის მდგომარეობით, ქართველ მეზღვაურებს შეუძლიათ, 51 ქვეყნის დროშის ქვეშ მცურავ გემებზე დასაქმდნენ და აქედან 19 ქვეყანა ევროკავშირის სახელმწიფოა.

მეზღვაურების დასაქმების მიღმა, 2019 წელს საზღვაო ტრანსპორტის სააგენტომ ქართველების დასაქმებას ორ ახალ სეგმენტში შეუწყო ხელი. საკრუიზო გემებზე პერსონალის დასაქმების თვალსაზრისით ჩამოყალიბდა ერთიანი მიდგომა, შედგა კონსულტაციები გემთფლობელებთან და პირველი ნაკადი დასაქმდა. ასევე, საზღვაო ტრანსპორტის სააგენტომ, გერმანიის საერთაშორისო თანამშრომლობის საზოგადოებასთან (GIZ) ერთად, შეიმუშავა საზღვაო კულინარიის პროგრამის მოდული. აღნიშნული სასერტიფიკატო კურსის გავლის შემდეგ მსურველებს შესაძლებლობა ექნებათ, გემებზე გემის მზარეულის, მისი დამხმარესა და სამაგიდე მომსახურე პერსონალის პოზიციებზე დასაქმდნენ,” - ნათქვამია სამინისტროს ინფორმაციაში.

თამარ იოსელიანის განცხადებით, საქართველოს საზღვაო სფეროში გატარებული რეფორმების შედეგად, საერთაშორისო საზღვაო ორგანიზაციამ მსოფლიოს 174 ქვეყანას შორის მხოლოდ 53 სახელმწიფო შეიტანა მეზღვაურთა თეთრ სიაში და მათ შორისაა, საქართველო.

„ეს არის ჩვენი ქვეყნის და მისი საზღვაო სექტორის დიდი აღიარება. რეფორმები, რომელსაც ვატარებთ, საქართველოს აყენებს მსოფლიოს წამყვან საზღვაო სახელმწიფოებს შორის, სადაც აღნიშნული დარგი დინამიურად ვითარდება. განსაკუთრებული აღნიშვნის ღირსია ჩვენი მეზღვაურები, რომელთა პროფესიონალიზმი აღიარებულია საერთაშორისო მასშტაბით,“ - განაცხადა თამარ იოსელიანმა.

სააგენტოს დირექტორმა ასევე ისაუბრა ფოთის საზღვაო სასწავლებელზე, რომლის ამოქმედების ინიციატივა პრემიერ-მინისტრს ეკუთვნის. თამარ იოსელიანის განცხადებით, ფოთში პროფესიული სასწავლებლის შენობის რეაბილიტაცია 2020 წელს უნდა დასრულდეს, ხოლო 2021 წლის გაზაფხულიდან მან სტუდენტების პირველი ნაკადი უნდა მიიღოს. ფოთის სასწავლებელი საწყის ეტაპზე 1000 სტუდენტზეა გათვლილი და 250 ადამიანს დაასაქმებს.

„პრეზენტაციაზე განსაკუთრებული ყურადღება გამახვილდა საქართველოს მონაწილეობაზე საერთაშორისო საზღვაო სისტემებში, რომელთა მიზანსაც ზღვაზე უსაფრთხოების ნორმების დაცვა წარმოადგენს. აღინიშნა, რომ ბოლო დროს საქართველო რამდენიმე საერთაშორისო სისტემაში გაწევრიანდა, რომელმაც მნიშვნელოვნად გაზარდა საქართველოს, როგორც საზღვაო სახელმწიფოს შესაძლებლობები საზღვაო უსაფრთხოების უზრუნველყოფის, ზღვაზე ძებნა-გადარჩენისა და ზღვის გარემოს დაცვის თვალსაზრისით. ასევე, საუბარი წარიმართა „ერთი ფანჯრის პრინციპის“ პროექტზე, რომელიც ითვალისწინებს საპორტო სექტორში ციფრული სერვისების დანერგვას, შემოსული გემების გათავისუფლებას ბიუროკრატიული ბარიერებისგან და არასაჭირო დოკუმენტაციის დამუშავების პროცესისგან. აღინიშნა, რომ პროექტის განხორციელება მნიშვნელოვნად შეამცირებს საქართველოს ნავსადგურებში გემების მოცდენის დროს, ხელს შეუწყობს ნავსადგურების მუშაობის ეფექტიანობისა და ტვირთნაკადების ზრდას,” - ნათქვამია სამინისტროს ინფორმაციაში.

ეკონომიკისა და მდგრადი განვითარების მინისტრის, ნათია თურნავას, თქმით, საქართველოს საზღვაო სექტორი ვითარდება, რაც ერთი მხრივ, აისახა ქართველი მეზღვაურების რაოდენობრივ და ხარისხობრივ დასაქმებაში, მეორე მხრივ კი საქართველოს საპორტო ინფრასტრუქტურისა და მომსახურების განვითარებაში.