2019 წელს საქართველოში 9 მლნ-ზე მეტი საერთაშორისო და 5 მლნ ტურისტული ვიზიტი განხორციელდა
2019 წელს საქართველოს ისტორიაში პირველად 9 მილიონზე მეტი საერთაშორისო ვიზიტი შედგა, - ამის შესახებ ტურიზმის ეროვნული ადმინისტრაციის ხელმძღვანელმა მარიამ ქვრივიშვილმა 2019 წლის ანგარიშის წარდგენისას განაცხადა.
მისი ინფორმაციით, 2019 წლის 27 დეკემბრის ჩათვლით, საქართველოში უკვე დაფიქსირდა 9.3 მილიონი საერთაშორისო მოგზაურის ვიზიტი. ზრდა წინა წლის ანალოგიურ პერიოდთან შედარებით +7.1%-ია.
რაც შეეხება ტურისტულ ვიზიტებს, ტურიზმის ეროვნული ადმინისტრაციის მონაცემებით, საქართველოში 5 მლნ ტურისტული ვიზიტი განცორციელდა, რაც წინა წლის ანალოგიურ პერიოდთან შედარებით 6.8%-ით მეტია.
2019 წლის იანვარი-ნოემბრის პერიოდში შემოსავალი საერთაშორისო მოგზაურობიდან 3.051.424.548 აშშ დოლარს შეადგენს. ზრდა წინა წლის ანალოგიურ პერიოდთან შედარებით +35 მილიონი აშშ დოლარია.
წლიური ანგარიშის წარდგენას საქართველოს პრემიერ-მინისტრი გიორგი გახარია, ეკონომიკისა და მდგრადი განვითარების მინისტრი ნათია თურნავა, სხვადასხვა სამთავრობო უწყებების, კერძო სექტორის, დიპლომატიური კორპუსის, დონორი ორგანიზაციებისა და მედიის წარმომადგენლები დაესწრნენ.