„ტურისტების ნაწილი ჯავშნებს აუქმებს“  - რა ვითარებაა ბაკურიანში, სადაც უკვე რამდენიმე დღეა წყლის მიწოდების პრობლემაა

უკვე რამდენიმე დღეა ბაკურიანს წყლის მიწოდების პრობლემა აქვს. როგორც ადგილობრივ სასტუმროებში „ბიზნესპრესნიუსს“ განუცხადეს, უწყლობის გამო დამსვენებლების ნაწილმა კურორტი საერთოდ დატოვა, ნაწილმა კი იმ სასტუმროებში გადაინაცვლა, რომელთაც წყლის საკუთარი რეზერვუარები აქვთ.

ამასთან, ადგილობრივი ბიზნესი ამბობს, რომ შექმნილი დისკომფორტის გამო ტურისტები უკმაყოფილებას გამოთქვამენ, გაუქმებული ჯავშნების გამო კი, სასტუმროების ნაწილი დიდ ზარალს განიცდის.

სასტუმრო „სნოუ პლაზა“ : - „იმის გამო, რომ წყალი წყდებოდა, წყლის რეზერვუარი საკმარისი არ გვქონდა, რაც დამსვენებლებმა გაგვიპროტესტეს, და ეს ლოგიკურიც არის, რადგან დიდი დისკომფორტია, შესაბამისად, სასტუმროდან გადიოდნენ. სულ ჯამში, 40 ნომერი გვაქვს და აქედან 15 ჯავშანი გაგვიუქმდა. მართალია, ჩვენთან პირველ სართულზე, საუნას და აუზს წყალი უპრობლემოდ მიეწოდება, მაგრამ ნომრებში ღამის საათებში წყდება.

გვეუბნებიან, რომ მუშაობენ, მაგრამ დღესაც იქნება თუ არა, არ ვიცით. დღის პირველ ნახევარში არის და მეორე ნახევარში როგორ იქნება, არ ვიცით.

ზარალი საკმაოდ დიდია. წარმოიდგინეთ, სასტუმროს 15 ჯავშანი რომ გაუქმდება, სადაც 2-კაციანი, 3-კაციანი და საოჯახო ნომრები შედის, რამხელა ზარალია... ჩვენ შემთხვევაში, ძირითადად, უცხოელმა ტურისტებმა დატოვეს სასტუმრო“.

სასტუმრო „ვილა პალასი“: - „წყალი დაბალი წნევით მოდის, თუმცა ჩვენ გვაქვს როგორც საკუთარი რეზერვუარი, ისე ჭა და ორივეს დახმარებით, დინების პრობლემა არ გვაქვს. თუმცა, ზოგადად, ამის გამო ბაკურიანში ბევრი სასტუმრო დაზარალდა. ტურისტების ნაწილმა ჯავშნები გააუქმა, ნაწილმა კი სასტუმრო შეიცვალა. ჩვენთანაც იყო შემთხვევა, როდესაც 5 ოჯახი სხვა სასტუმროდან გადმოვიდა“.

პრობლემის მიზეზად გაერთიანებული წყალმომარაგების კომპანია ბაკურიანის სწრაფ ზრდას ასახელებს. როგორც მათ მიერ 4 იანვარს გავრცელებულ განცხადებაშია აღნიშნული, ბაკურიანის მხოლოდ 70%-ს აქვს 24-საათიანი წყალმომარაგება.

კომპანიის ცნობით, პრობლემის აღმოსაფხვრელად შესაბამისი ბრიგადები ამ დრომდე მუშაობენ, რათა წყლის დამატებითი მარაგის მოძიება მოხერხდეს.

„კომპანიის ტექნიკურმა ჯგუფმა წყლის მარაგის გაზრდის მიზნით, გარკვეულ მონაკვეთებზე ახალი მილი მოაწყო. პარალელურად, კომპანია ყველა იმ სასტუმროს, სადაც წყლის მიწოდება შეზღუდულია, ამარაგებს წყალმზიდების საშუალებით. პროცესში ჩართულია 112-ის მანქანები, რომელთა დახმარებით წყლის მიწოდება წყალმზიდებამდე წაღვერიდან და ბორჯომიდან ხორციელდბა. გარდა ამისა, სამაშველო მანქანები მთელი ღამის განმავლობაში იმუშავებენ შემკრები რეზერვუარის შესავსებად.

გამომდინარე იქედან, რომ ტურისტული ობიექტების განაშენიანება ყოველწლიურად საკმაოდ სწრაფად იზრდება და სეზონის ყველაზე აქტიურ პერიოდში წყლის მოხმარება საკმაოდ მაღალია, არსებული მარაგი საკმარისი არ არის. აღნიშნულის შესახებ გაერთიანებული წყალმომარაგების კომპანიას წინასწარ ქონდა კომუნიკაცია სასტუმროებთან და მოახდინა ინფორმირება სეზონის ყველაზე აქტიურ მონაკვეთში, წყლის მიწოდების შესაძლო შეზღუდვასთან დაკავშირებით.

ბაკურიანში ქსელის განვითარებისა და ახალი სისტემების მშენებლობის მეორე ეტაპის განხორციელება უახლოეს პერიოდში დაიწყება, რაც საბოლოოდ აღმოფხვრის სეზონის აქტიურ პერიოდში წარმოქმნილ პრობლემებს”,-ნათქვამია განცხადებაში.

ნინი ქეთელაური