მსოფლიოში ყველაზე მაღალი ლიფტი, საბაგირო, ექსტრემალური ატრაქციები - ენგურის ტურისტული ზონის მოწყობაზე კვლევები დასრულდა (+ფოტო)
ენგურის ტურისტული ზონის მოწყობის პროექტის სოციო-ეკონომიკური და ტექნიკური კვლევის მასალები, საქართველოს მთავრობის მიერ მისი განხილვისა და განხორციელებაზე მიღებული გადაწყვეტილების შემდეგ გასაჯაროვდება.
ამის შესახებ ინფორმაციას ორგანიზაცია საქართველოს კულტურული მემკვიდრეობა ავრცელებს. მათივე ცნობით, ამ ეტაპზე უკვე მზადაა საერთაშორისო კომპანია Colliers-ის მიერ მომზადებული დოკუმენტი, რომელიც მსხვილ ინფრასტრუქტურულ პროცესში ჩართულ სახელმწიფო უწყებებს პროექტის ფინასურ-ეკონომიკური და სოციალური ეფექტის შესახებ წინასწარ მონაცემებს აძლევს. კვლევა საქართველოს ენერგეტიკის განვითარების ფონდის დაკვეთით მომზადდა. აღმასრულებელი ხელისუფლების მსჯელობის შემდეგ გაირკვევა რეგიონული მნიშვნელობის ტურისტული ზონის განვითარების მოდელი, რომელიც მასში კერძო საინვესტიციო ჯგუფების ჩართვის შესაძლელობას განსაზღვრავს.
მოცემულ ეტაპზე არ გამოირიცხება პროექტის კერძო-საჯარო პარტნიორობის ფორმატში განხორციელება. შეგახსენებთ, რომ ენგურჰესის ტურისტული ზონის მოწყობის პროექტირების სამუშაოები ესტონურმა დიზაინ-არქიტექტურულმა კომპანია „კოკო არქიტექს“-მა შპს „ენგურის ტურისტული ცენტრი“-ს ინიციატივით მოამზადა, რომელიც საქართველოს კულტურული მემკვიდრეობის დაცვის ეროვნული სააგენტოს, ენერგეტიკის განვითარების ფონდისა და ენგურჰესის თაღოვანი კაშხლის ადმინისტრაციის მიერ ერთობლივად დაფუძნებული საწარმოა.
პროექტის მიხედვით, მსოფლიო დონის ატრაქციის - ენგურჰესის კაშხლის ტურისტული ინფრასტრუქტურა გადასახედ მოედნებს, საბაგირო გზას, სამეცნიერო და აღმოჩენათა ცენტრს, ღია საკონცერტო სივრცეს, სანაოსნო ინფრასტრუქტურას, მსოფლიოში არსებულ ყველაზე მაღალ ლიფტს (280 მ) და ექსტრემალური კომპონენტების შემცველ რამდენიმე ატრაქციას მოიცავს. პროექტირების ეტაპზე, საპროექტო ჯგუფსა და კულტურული მემკვიდრეობის დაცვის ეროვნული სააგენტოს ერთობლივი კონსულტაციებით, დეტალურად განისაზღვრა ტურისტული მარშრუტების საბოლოო მოდელებიც.
„წინასწარი მონაცემებით, ზონის მოწყობის პროცესში რამდენიმე ასეული ადამიანი იქნება ჩართული. პარალელური სერვისების კუთხით კი ტურისტულ სივრცეში მუდმივად დასაქმდება 200-მდე ადგილობრივი მცხოვრები. არსებული გათვლებით, ენგურის ტურისტული ზონა რეგონიში ყველაზე შემოსავლიანი ტურისტული ობიექტი იქნება, რომელიც წელიწადში სავარაუდოდ 400 ათასამდე ტურისტს მოემსახურება,“-აღნიშნულია ორგანიზაციის ინფორმაციაში.
პროექტის საინვესტიციო ღირებულება 26 მლნ დოლარადაა განსაზღვრული.
