„ლელო საქართველოსთვის” მიმართავს კონკურენციის სააგენტოს, შეისწავლოს ავიაციის ბაზარი
„ლელო საქართველოსთვის“ კონკურენციის სააგენტოსგან ავიაციის ბაზრის შესწავლას ითხოვს.
როგორც ორგანიზაციაში აცხადებენ, აუცილებელია გასაჯაროვდეს ინფორმაცია, თუ რომელი ავიაკომპანია რა პირობითა და ვალდებულებით იღებს სახელმწიფო სუბსიდიას.
„ჩვენი რამდენიმეთვიანი მცდელობის მიუხედავად, ეკონომიკის სამინისტრო და შპს „საქართველოს აეროპორტების გაერთიანება“ მკაცრად და საეჭვოდ ასაიდუმლოებს საავიაციო ბაზარზე არსებული სახელმწიფო სუბსიდიების შესახებ ინფორმაციას. ამიტომ მივმართავთ საქართველოს კონკურენციის სააგენტოს, შეისწავლოს საქართველოს საავიაციო ბაზარი და შესაბამისი სახელმწიფო ინტერვენციები.
„ლელო საქართველოსთვის“ თავის ხედვებში და სამომავლო გეგმებში დიდ ყურადღებას უთმობს საქართველოს საავიაციო ჰაბად გარდაქმნის საკითხს. გვჯერა, რომ ამ კუთხით ჩვენს ქვეყანას დიდი პოტენციალი გააჩნია. ჩვენ შეგვიძლია მნიშვნელოვნად გავზარდოთ არა მხოლოდ მგზავრთა ნაკადი საქართველოში და საქართველოდან, არამედ საქართველოს გავლითაც. ამას გარდა, ჩვენ ვიცით, როგორ განვავითაროთ სატვირთო გადაზიდვების ინდუსტრია და როგორ მოვიზიდოთ მულტინაციონალური კომპანიები ამ სექტორში.
ასეთი ამბიციური გეგმების განსახორციელებლად კი აუცილებელ წინაპირობად მიგვაჩნია გამჭვირვალე და კონკურენტული ბაზარი, სადაც თამაშის წესები იქნება სამართლიანი და ყველასთვის თანაბარი. ამიტომ ვითხოვთ ინფორმაციის გასაჯაროებას იმის შესახებ, თუ რომელი ავიაკომპანია რა პირობითა და ვალდებულებით იღებს სუბსიდიას სახელმწიფო უწყებებიდან. ველით კონკურენციის სააგენტოს მყისიერ რეაგირებას“, - აცხადებენ „ლელო საქართველოსთვის“.