ბოლო 24 საათში, ძლიერი ქარის გამო, 112-ში საქართველოს მასშტაბით 64 შეტყობინება შევიდა

ბოლო 24 საათში, ძლიერი ქარის გამო, შინაგან საქმეთა სამინისტროს გადაუდებელი დახმარების ოპერატიულ მართვის ცენტრ 112-ში საქართველოს მასშტაბით 64 შეტყობინება შევიდა. ამის შესახებ ინფორმაციას შინაგან საქმეთა სამინისტროს საგანგებო სიტუაციების მართვის სამსახური ავრცელებს.

მათივე ცნობით, შეტყობინებების უმრავლესობა პრევენციული ხასიათის იყო და სახურავებიდან თუნუქის ფურცლების ჩამოვარდნის ან ხის წაქცევის საფრთხეს ეხებოდა.

„ყველა მათგანზე მეხანძრე-მაშველებმა დროული რეაგირება მოახდინეს. გამოძახებების უმრავლესობა თბილისიდან იყო - 49. რაც შეეხება რეგიონებს, სამეგრელო-ზემო სვანეთში - 2, იმერეთში- 2, გურიაში - 1, შიდა ქართლში - 4, ქვემო ქართლში- 3, აჭარაში - 2, მცხეთა-მთიანეთში კი - 1 შეტყობინება დაფიქსირდა. შემთხვევების შედეგად არავინ დაშავებულა”,- ნათქვამია განცხადებაში.