როგორ შეიცვალა ბიძინა ივანიშვილის ქონება 1 კვირაში - ახალი კორონა ვირუსის ეფექტი საფონდო ბირჟებზე
მსოფლიოს უმდიდრესი 500 ადამიანის ქონება გასული კვირის განმავლობაში 444 მილიარდი დოლარით შემცირდა.
ამის შესახებ Bloomberg-ი წერს, რომელსაც ინფორმაციის დასტურად მსოფლიოს საფონდო ბირჟებზე არსებული ვითარება მოჰყავს, სადაც ახალი კორონა ვირუსის გავრცელების ფონზე ინდექსები დაეცა.
სააგენტოს ცნობით, მსოფლიოს უმდიდრესმა სამმა ადამიანმა Amazon-ის ხელძღვანელმა ჯეფ ბეზოსმა, Microsoft-ის დამფუძნებელმა ბილ გეიტსმა და LVMH (Louis Vuitton Moet Hennessy)-ის ხელძღვანელმა ბერნი სანდერსმა ყველაზე მეტად იზარალეს ბოლო შვიდი დღის განმავლობაში. სააგენტოს ცნობით, მათმა ჯამურმა დანაკარგმა დაახლოებით 30 მილიარდი დოლარი შეადგინა.
გაზეთ The Wall Street Journal-ის ინფორმაციით, მიმდინარე კვირა გახდა ამერიკის საფონდო ბირჟებისთვის ყველაზე წარუმატებელი 2008 წლის ფინანსური კრიზისის შემდეგ. Dow Jones-მა ამ ერთ კვირაში 12,4%-ით იკლო, S&P 500-ის ინდექსმა - 11,5%, Nasdaq-მა კი - 10,5%.
მილიარდერების რეიტინგში საქართველოდან მხოლოდ, ბიძინა ივანიშვილი ხვდება. მისი ქონება ბოლო 1 კვირის განმავლობაში 180 მლნ დოლარით შემცირდა. კერძოდ, 23 თებერვლის მონაცემებით, მისი ქონება 5.55 მლრდ დოლარად იყო შეფასებული, 1-ლი მარტის მდგომარეობით კი - 5.37 მლრდ დოლარია. რეიტინგში ბიძინა ივანიშვილი 354-ე ადგილზეა.
5.37 მლრდ დოლარად ბიძინა ივანიშვილს შეუძლია შეიძინოს 3.38 მილიონი უნცია ოქრო და 104 მილიონი ბარელი ნავთობი. მისი ქონება უტოლდება შეერთებული შტატების მშპ-ს 0.0261%-ს, შეერთებულ შტატებში „ტოპ“ 200 აღმასრულებელი დირექტორისთვის მიცემული კომპენსაციის 85%-ს, შეერთებული შტატების „ტოპ“ 100 კოლეჯის შემოწირულობის 1.36%-ს.
აღსანიშნავია, რომ მილიარდერების ინდექსის თანახმად, ივანიშვილის ქონება ყველაზე მაღალი - 2013 წელს იყო, როცა 6.40 მლრდ აშშ დოლარს შეადგენდა.
გამოცემას ბიზნესმენთან დაკავშირებით მცირე ინფორმაციაც აქვს დატანილი, სადაც ივანიშვილის ბიზნეს საქმიანობის დაწყებისა და პოლიტიკური კარიერის მოკლე ისტორიაა ასახული.
„ივანიშვილმა კარიერა პოსტ-საბჭოთა რუსეთში 1990-იან წლებში რკინის მადნის მოპოვებაში, ბანკებსა და უძრავ ქონებაში ფულის ჩადებით დაიწყო. თავისი აქტივების უმეტესობა 2003-2006 წლებში გაყიდა, დანარჩენი ნაწილი გაიყიდა საქართველოში პრემიერ-მინისტრად არჩევამდე 2012 წელს. ერთი წლის შემდეგ კი ის თანამდებობიდან გადადგა,“ - იუწყება გამოცემა.
ცნობისთვის, Bloomberg-ის მილიარდერების ინდექსი მსოფლიოს ყველაზე მდიდარი ადამიანების ყოველდღიური რეიტინგია. Bloomberg-ის მილიარდერთა სიაში სულ 500 მილიარდერია.
