ევროპის ცენტრალური ბანკის პროგნოზით, ევროპაში რეცესია უფრო ღრმა იქნება, ვიდრე მსოფლიოს სხვა ქვეყნებში
ევროპა შესაძლოა, უფრო სერიოზული რეცესიის წინაშე აღმოჩნდეს, ვიდრე მსოფლიოს სხვა რეგიონები. ევროპის ეკონომიკის გამოცოცხლების ნიშნები კი მხოლოდ მომავალი წლიდან დაიწყება - ამის შესახებ განცხადება ევროპის ცენტრალური ბანკის ვიცე-პრეზიდენტმა ლუის დე გინდოსმა გააკეთა.
ეკონომიკის ზრდის პერსპექტივა უარესდება ევროპაში საკარანტინო რეჟიმის გახანგრძლივების ფონზე. პირველ კვარტალში საფრანგეთის ეკონომიკა 6%-ით შემცირდა, გერმანიის მშპ-ს კი 10%-იან ვარდნას უწინასწარმეტყველებენ, - წერს Bloomberg-ი.
”ევროზონის ყველაზე სავარაუდო სცენარის მიხედვით, ეკონომიკის ზრდის ნიშნები მესამე კვარტლიდან გამოჩნდება, თუმცა აქტივობის აღდგენა რეალურად უკვე 2021 წლიდან დაიწყება“, - განაცხადა გინდოსმა ესპანურ გაზეთ La Vanguardia– სთან ინტერვიუში. მისივე თქმით, „ნებისმიერ შემთხვევაში, 2021 წლის დინამიკა ვერ შეძლებს 2020 წლის ვარდნის კომპენსირებას“.