„საქართველოს ალიანსი უსაფრთხო გზებისთვის“ - მიმდინარე წლის პირველ კვარტალში 1236 ავტოსაგზაო შემთხვევა მოხდა, დაიღუპა 134 ადამიანი, ხოლო დაშავდა 1610 პირი
2020 წლის პირველ კვარტალში სულ 1236 ავტოსაგზაო შემთხვევა მოხდა (სსკ–ის 276-ე მუხლის მიხედვით), დაიღუპა 134, ხოლო დაშავდა 1610 პირი. ამის შესახებ ინფორმაციას „საქართველოს ალიანსი უსაფრთხო გზებისთვის“ ავრცელებს.
მათივე ინფორმაციით, შსს მიერ აღრიცხული საგზაო-სატრანსპორტო შემთხვევების სტატისტიკა 2019-2020 წლების პირველი კვარტალის (იანვარ-მარტი) მონაცემთა ანალიზის მიხედვით, წინა წლის იგივე პერიოდთან შედარებით დაღუპულთა რიცხვი 15,5%-ით გაიზარდა, ხოლო საგზაო შემთხვევების რაოდენობა - 5%-ით, დაშავებულთა რიცხვი კი შემცირდა 9,5%-ით. აღსანიშნავია, რომ თბილისში დაიღუპა 25 ადამიანი, ხოლო 721 პირი კი დაშავდა.
შემთხვევების რაოდენობის მიხედვით დედაქალაქის შემდეგ იმერეთი, რაჭა-ლეჩხუმი და ქვემო სვანეთია, სადაც 134 ავტოსაგზაო შემთხვევა მოხდა, აჭარაში კი - 105 შემთხვევა.
ავტოავარიაში ყველაზე მეტი ადამიანი დაიღუპა იმერეთში, რაჭა-ლეჩხუმისა და ქვემო სვანეთის რეგიონებში - 32 პირი.
2020 წლის პირველ კვარტალში 0-16 წლამდე 8 მოზარდი დაიღუპა, ხოლო 142 დაშავდა. გარდაცვლილია 33 ქვეითად მოსიარულე და დაშავებულია – 349 ქვეითი.
„საგზაო შემთხვევათა გამომწვევი მიზეზები კი შემდეგია: შემხვედრი მოძრაობის ზოლში გადასვლა ან გასწრების წესების დარღვევა, მოძრაობის დადგენილი სიჩქარის გადაჭარბება, დისტანციის დაუცველობა და სატრანსპორტო საშუალების მართვა ალკოჰოლური სიმთვრალის მდგომარეობაში
ცნობისთვის, საგზაო-სატრანსპორტო შემთხვევების ოფიციალური სტატისტიკა მიწოდებულია შინაგან საქმეთა სამინისტროს მიერ - info.police.ge“ , - ნათქვამია ინფორმაციაში.