ნათია თურნავა პროდუქტებზე ფასების მომატებაზე - ეს არის გლობალური შოკი, ეს არის შოკი ჩვენი ბაზრისთვის და აქედან გამომდინარე, ფასების რყევაც ამითაა განპირობებული

ეს არის გლობალური შოკი, ეს არის შოკი ჩვენი ბაზრისთვის და აქედან გამომდინარე, ფასების რყევაც ამით არის განპირობებული, - ამის შესახებ ეკონომიკისა და მდგრადი განვითარების მინისტრმა ნათია თურნავამ განაცხადა, როდესაც უპასუხა დასმულ შეკითხვას, რატომ მოიმატა ქვეყანაში პროდუქტებზე ფასებმა და რა გეგმა არსებობს ამ პრობლემის მოგვარებისათვის.

მინისტრის თქმით, ფასების ზრდას სხვადასხვა გამომწვევი მიზეზები აქვს.

„ძალიან მტკივნეული შეკითხვაა, მტკივნეული პროცესია. რა თქმა უნდა, ამ გლობალურ გამოწვევას არ შეეძლო ჩაევლო ისე, რომ ეს ჩვენს ბაზარს არ დატყობოდა და მათ შორის, სამომხმარებლო ფასებსაც. ამას სხვადასხვა გამომწვევი მიზეზები აქვს, მათ შორის, ეროვნულ ვალუტასთან და მის კურსთან დაკავშირებული პრობლემები, რაც ასევე გამოწვეულია ამ გლობალური კრიზით, რადგან პირველი, რაც მოხდა, შემცირდა სავალუტო შემოდინებები და ის ინდუსტრიები, როგორიც არის ტურიზმი, ექსპორტზე ორიენტირებული ინდუსტრიები შენელდა და შეჩერდა.

შესაბამისად, შეჩერდა სავალუტო შემოდინებები, მათ შორის, იმ ადამიანების მხრიდანაც, ვინც საზღვარგარეთ არის წასული და აქ რიცხავდა საკუთარი შრომის ნაყოფს და ძალიან დიდი შემოსავალი აქედან შემოდიოდა. თუმცა, არა მარტო. ეს არის გლობალური შოკი, ეს არის შოკი ჩვენი ბაზრისთვის და აქედან გამომდინარე, ფასების რყევაც ამით არის განპირობებული. ეს ნიშნავს იმას, რომ როდესაც ჩვენ გადავლახავთ კრიზისს, რა თქმა უნდა, სტაბილიზაცია მოხდება“, - განაცხადა ნათია თურნავამ.

მინისტრის თქმით, 2021 წელს, არსებობს ყველა წინა პირობა იმისა, რომ ინფლაცია დაუბრუნდეს ე.წ. მიზნობრივ ნიშნულს , ანუ საკმაოდ დაბალი იყოს - 3%.

„ჩვენ ყველაფერი გავაკეთეთ იმისათვის, რომ მთავარი პროდუქციის ფასების მერყეობა დაგვეზღვია. იცით, რომ ეს პროგრამა არსებობს. 9 ძირითადი სასაქონლო საკვები პროდუქტი, რომლიც მომხმარებელთა კალათის დიდ ნაწილს შეადგენს, სპეციალური პროგრამის ფარგლებში არის, მასზე ფასების ზრდა დაზღვეულია.

ისევ ვამბობ, ეს არის კრიზისი და კრიზისს აქვს თავისი გამოხატულებები. ვერანაირად ვიტყვით იმას, რომ ეს უმტკივნეულოდ ჩაივლის და აქედან გამომდინარე, ფასებზე ნეგატიური ზემოქმედება ერთ-ერთი გამოვლინებაა ამ ეკონომიკური კრიზისის“, - განაცხადა თურნავამ.