პირდაპირი უცხოური ინვესტიციები 41.7%-ით შემცირდა

წინასწარი მონაცემებით, საქართველოში განხორციელებული პირდაპირი უცხოური ინვესტიციების მოცულობამ 2020 წლის 1-ელ კვარტალში 165.4 მლნ. აშშ დოლარი შეადგინა, რაც 2019 წლის 1-ლი კვარტალის წინასწარ მონაცემებზე 41.7 პროცენტით ნაკლებია.

სტატისტიკის ეროვნული სამსახურის მონაცემებით, შემცირების გამომწვევ ძირითად მიზეზებს შორის აღსანიშნავია მაგისტრალური გაზსადენის მშენებლობის პროექტის დასრულება და რამდენიმე საწარმოს გადასვლა საქართველოს რეზიდენტის საკუთრებაში.

აღსანიშნავია, რომ მიმდინარე წლის საანგარიშო პერიოდში განხორციელებული პირდაპირი უცხოური ინვესტიციების მოცულობა ყველაზე დაბალია 2009 წლის შემდეგ.

კერძოდ, წლების მიხედვით, 2019 წლის 1-ელ კვარტალში - 283.6 მლნ აშშ დოლარი; 2018 წლის ამავე პერიოდში - 323.5 მლნ დოლარი; 2017-ში - 411.7 მლნ დოლარი; 2016 წლის 1-ელ კვარტალში - 392.2 მლნ დოლარი; 2015 წლის საანგარიშო პერიოდში - 343.4 მლნ დოლარი; 2014-ში - 331.9 მლნ დოლარი; 2013 წლის ამავე პერიოდში - 291.8 მლნ დოლარი; 2012 წლის 1-ელ კვარტალში - 312.4 მლნ; 2011-ში - 222.6 მლნ; 2010 წლის 1-ელ კვარტალში - 176.1 მლნ; ხოლო 2009 წლის საანგარიშო პერიოდში - 114.5 მლნ აშშ დოლარი იყო.

თაია არდოტელი