ევროპელი ფოლადის მწარმოებლები ევროკავშირისგან იმპორტის კვოტების შემცირებას ითხოვენ
ევროპელი ფოლადის მწარმოებლები ევროკავშირს იმპორტის კვოტების შემცირებისკენ მოუწოდებენ და აფრთხილებენ, რომ მიწოდებამ შეიძლება საფრთხეს შეუქმნას ევროპაში იმ ინდუსტრიას, რომელიც კორონავირუსული პანდემიის შედეგად ისედაც სერიოზულად დაზარალდა.
ამის შესახებ ინფორმაციას Reuters-ი ავრცელებს.
”ევროპული ფოლადის ინდუსტრია სერიოზული რისკის ქვეშაა, რადგან (ევროპული) კომისიის შეთავაზებაში, რომელიც ფოლადის წარმოებისთვის დამცავი ზომების მიღებას გულისხმობს, გათვალისწინებული არ არის მოთხოვნის მკვეთრი ვარდნა,” - ნათქვამია წერილში, რომელიც გავრცელებულია Eurofer-ის ინდუსტრიული ჯგუფის მიერ.
მარტიდან ევროკავშირში ფოლადზე მოთხოვნა 50% -ით შემცირდა, ხოლო ინდუსტრიაში დასაქმებული მუშახელის 40% ან ნახევარგანაკვეთზე გადავიდა ან დამსაქმებლებმა განუსაზღვრელი დროით შვებულებაში გაუშვეს. ამიტომ, მწარმოებლები ევროკავშირისგან იმპორტის კვოტების შემცირებას ითხოვენ.
განცხადებას ხელს აწერენ მსოფლიოს უდიდესი ფოლადის მწარმოებელი კომპანიების ხელმძღვანელები, მათ შორის, ArcelorMittal-ის, Tata Steel-ის, ThyssenKrupp-ის და Salzgitter-ის.