გერმანიაში ერთჯერადი პლასტიკის ჭურჭლის და ჩხირების გაყიდვა აიკრძალება

გერმანიაში ერთჯერადი პლასტიკური ნივთების გაყიდვა აიკრძალება.

საუბარია, ერთჯერადი დანების, ჩანგლების, კოვზების, კონტეინერების და ყურის ჩხირების აკრძალვაზეც. ამ გადაწყვეტილების მიზეზი არის პლასტიკური ნარჩენების რაოდენობის შემცირება, რომელიც აბინძურებს გარემოს - იტყობინება ABC News.

გერმანიის მთავრობის გადაწყვეტილებით, აკრძალვა ძალაში 2021 წლის 3 ივლისიდან შევა. გარემოს დაცვის მინისტრის სვენია შულძცის თქმით, პარკებში და სხვა საზოგადოებრივ ადგილებში მოგროვილი ნაგვის 20% -მდე სწორედ პლასტიკურ ნივთებზე მოდის.

როგორც ცნობილია, პლასტმასის დაშლას ათწლეულები სჭირდება. ამიტომ, ქვეყნები ერთჯერადი პლასტიკის ჭურჭლის გამოყენებას ეტაპობრივად კრძალავენ. გასული წლის მაისში გაერთიანებული ერების ორგანიზაციაში მსოფლიოს 180-მა ქვეყანამ მიიღო ერთობლივი გადაწყვეტილება მსოფლიო ოკეანის დაბინძურების შემცირების შესახებ. მათ აღნიშნეს, რომ პოლიეთილენის პარკები და ბოთლები ოკეანეში ბინადარ ცხოველებსა და თევზებს ხშირად საფრთხეს უქმნიან.