Gepherrini სტრატეგიას ცვლის - რას გეგმავს კომპანია პოსტპანდემიურ პერიოდში
ჩანთების, აქსესუარებისა და ფესაცმლის ბრენდი Gepherrini სტრატეგიას ცვლის.
კერძოდ, როგორც „ბიზნესპრესნიუსთან“ საუბრისას კომპანიის ხელმძღვანელი ილია გეფერიძე აცხადებს, ახლა მათი მთავარი სტრატეგია არა ფიზიკური მაღაზიების გახსნა, არამედ ონლაინ-გაყიდვების მიმართულებით გააქტიურება იქნება.
„პანდემიის პერიოდში ერთი რამ გამოიკვეთა - გაიზარდა და თითქმის გაათმაგდა ონლაინ-გაყიდვები. შესაბამისად, ჩვენი ბრენდის სტრატეგია შეიცვლება, ადრე თუ იყო ფიზიკური მაღაზიების გახსნა მთავარი სტრატეგია, ახლა მთავარი მიმართულებად ჩამოყალიბდება ონლაინ-პლატფორმები და ამ მიმართულებით აქტიურად ვმუშაობთ.
ზოგადად ონლაინ-გაყიდვები მთლიან რეალიზაციაში 5% იყო და გვსურს, რომ ეს მაჩვენებელი 15%-მდე ავიდეს. თუმცა ამ დროისთვის ზუსტი პროგნოზის გაკეთება შეუძლებელია, ალბათ, უახლოეს 3 თვეში უფრო გამოიკვეთება, რას გავაკეთებთ. მაგრამ ის, რომ ონლაინ გაყიდვები იქნება მთავარი სტრატეგია, უკვე ვიცით“, - განაცხადა ილია გეფერიძემ.
ცნობისთვის, Gepherrini ქართულ ბაზარზე 2014 წლიდან გამოჩნდა. ტრადიციული ორნამენტებით გაწყობილმა, გეომეტრიული დიზაინის ჩანთებმა დაინტერესება არა მხოლოდ ადგილობრივ ბაზარზე, არამედ მსოფლიოს მრავალ ქვეყანაში გამოწვია. Gepherrini-ს პროდუქცია იყიდება ამერიკის შეერთებულ შტატებში, საფრანგეთში, უკრაინაში, ყაზახეთში, შვედეთში, ჩინეთში, სულ 11 ქვეყანაში. საქართველოში კომპანია 6 სავაჭრო წერტილით არის წარმოდგენილი, აქედან 5 თბილისში და ერთი ბათუმში.
კორონავირუსის პანდემიამ სხვა ყველა ბიზნესთან ერთად, Gepherrini-ც დააზარალა. ილია გეფერიძე აცხადებს, რომ გაყიდვები ფაქტობრივად, გაუნახევრდათ. მისივე თქმით, მიუხედავად, ონლაინ-ვაჭრობის ზრდისა, მან გაყიდვებში საერთო სურათი ვერ შეცვალა.
„იმის გამო, რომ საწარმო დაკეტილი იყო და თანამშრომლები უხელფასო შვებულებაში გვყავდა, ზარალი ფაქტობრივად, არ გვქონია. 1-ლი ივნისიდან გაიხსნა საწარმო და ვაკვირდებით ახლა სიტუაციას, რა იქნება. ერთი შეღავათი ის გვაქვს, რომ სავაჭრო ცენტრებმა გადასახადი 35-50%-ით შეგვიმცირეს, გრძელვადიანი თანამშრომლობით თავადაც არიან დაინტერესებულები. ახლა მთავარი ისაა, რომ კიდევ უფრო არ შემცირდეს გაყიდვები და ეპიდემიოლოგიური სიტუაცია არ გართულდეს“, - განაცხადა ილია გეფერიძემ „ბიზნესპრესნიუსთან“ საუბრისას.
