ჩაჩავას ქუჩის მონაკვეთზე დაგეგმილი სარეაბილიტაციო სამუშაოების გამო, ტრანსპორტის მოძრაობა დროებით შეიზღუდება

თბილისის მერიის ინფორმაციით, ჩაჩავას ქუჩაზე, აწყურის ქუჩიდან კახეთის გზატკეცილამდე არსებულ საგზაო მონაკვეთში დაგეგმილი სარეაბილიტაციო სამუშაოების გამო, 15 ივლისის 21:00 საათიდან, 27 ივლისის 23:00 საათამდე, სატრანსპორტო მოძრაობა დროებით შეიზღუდება.

სატრანსპორტო საშუალებები ალტერნატიული გზების გამოყენებით შეძლებენ გადაადგილებას:

აწყურის ქუჩიდან კახეთის გზატკეცილზე მოხვედრა შესაძლებელი იქნება ლეხ კაჩინსკისა და ბუშის ქუჩების გავლით. ასევე, ქეთევან დედოფლის გამზირიდან კახეთის გზატკეცილთან დაკავშირება შესაძლებელი იქნება, როგორც ლეხ კაჩინსკისა და ბუშის ქუჩების, ასევე, მოსკოვის გამზირისა და ჯავახეთის ქუჩის დახმარებით; კახეთის გზატკეცილსა და ქეთევან დედოფლის გამზირს ერთმანეთთან ჯ. ბუშისა და ლ. კაჩინსკის ქუჩები, ასევე, მოსკოვის გამზირი და ჯავახეთის ქუჩა დააკავშირებს.

ამასთანავე, შეიცვლება ავტობუსების - N1, N8, N12, N18, N22, N30, N41, N43, N56, N67 და N71 მარშრუტები. კერძოდ, N1, N8, N12, N18, N22, N30, N41 და N56 ავტობუსის მარშრუტები მეტროსადგური „ისნის“ მიმდებარედ არსებული ბოლო გაჩერებიდან მოსკოვის გამზირისკენ მოძრაობისთვის, მობრუნების მიზნით, ჩაჩავას ქუჩის, აწყურის ქუჩისა და კახეთის I შესახვევის ნაცვლად, თავდაპირველად, მოძრაობას გააგრძელებენ ლეხ კაჩინსკის ქუჩის მიმართულებითა და ქეთევან დედოფლის გამზირით. შემდეგ, ლეხ კაჩინსკის, აწყურის ქუჩისა და კახეთის I შესახვევის გავლით, დადგენილი სქემით იმოძრავებენ.

N43 ავტობუსი მეტრომშენის დასახლებიდან ბარათაშვილის ქუჩის მიმართულებით მოძრაობისას, კახეთის გზატკეცილიდან, მეტროსადგური „ისნის“ ნაცვლად, მოძრაობას ბუშისა და ლეხ კაჩინსკის ქუჩების მიმართულებით გააგრძელებს, რის შემდეგაც, ქეთევან დედოფლის გამზირიდან დადგენილი სქემით იმოძრავებს; ავტობუსის - N67 მარშრუტი მეტრომშენის დასახლებიდან სამგორის ქუჩის მიმართულებით მოძრაობისას, მეტროსადგური „ისნის“ ნაცვლად, ჯავახეთის ქუჩის მიმართულებით იმოძრავებს. შემდეგ, მოსკოვისა და ქეთევან დედოფლის გამზირების, ლეხ კაჩინსკისა და ბუშის ქუჩების გავლით, კახეთის გზატკეცილზე გადავა. შემდგომ კი, მეტრომშენის დასახლების მიმართულებით იმოძრავებს. აღნიშნული მარშრუტი წრიული იქნება.

N71 ავტობუსი კახეთის გზატკეცილიდან, მეტროსადგური „ისნის“ ნაცვლად, მოძრაობას ბუშის ქუჩის მიმართულებით გააგრძელებს. შემდეგ, ლეხ კაჩინსკის, ბოჭორმის, იალბუზის ქუჩებისა და მტკვრის მარცხენა სანაპიროს გავლით, დოდაშვილის მოედანს დაუკავშირდება, რის შემდეგაც, დადგენილი სქემით იმოძრავებს. უკუმიმართულებისას, ავტობუსი ნავთლუღის ქუჩიდან, მეტროსადგურ „ისნის“ ნაცვლად, ლეხ კაჩინსკის ქუჩისკენ იმოძრავებს. შემდეგ, ბუშის ქუჩისა და კახეთის გზატკეცილის გავლით, მოძრაობას დადგენილი სქემით გააგრძელებს.

რაც შეეხება მიკროავტობუსებს, N34, N62, N72 და N170 მარშრუტები კახეთის გზატკეცილიდან მოძრაობას ბუშისა და ლეხ კაჩინსკის ქუჩების მიმართულებით გააგრძელებენ. შემდეგ, ქეთევან დედოფლის გამზირიდან დადგენილი სქემით იმოძრავებენ. უკუმიმართულებისას, მარშრუტები მეტროსადგური „ისნის“ ნაცვლად, ლეხ კაჩინსკის ქუჩისკენ გადაადგილდებიან, რის შემდეგაც, ბუშის ქუჩისა და კახეთის გზატკეცილის გავლით მოძრაობას დადგენილი სქემით გააგრძელებენ.

მიკროავტობუსების - N149 და N150 მარშრუტები კახეთის გზატკეცილიდან ბუშის ქუჩის მიმართულებით იმოძრავებს. შემდეგ, ლეხ კაჩინსკის, აწყურის ქუჩისა და კახეთის I შესახვევის გავლით ნავთლუღის ქუჩის მიმართულებით, შემდეგ კი დადგენილი სქემით გადაადგილებას შეძლებენ. უკუმიმართულებისას, მარშრუტები ნავთლუღის ქუჩიდან, ლეხ კაჩინსკის ქუჩისკენ იმოძრავებენ, რის შემდეგაც, ბუშის ქუჩისა და კახეთის გზატკეცილის გავლით, სვლას დადგენილი სქემით გააგრძელებენ.

N28, N119, N175 და N205 მარშრუტები კახეთის გზატკეცილიდან მოძრაობას ბუშისა და ლეხ კაჩინსკის ქუჩების მიმართულებით გააგრძელებენ. შემდეგ, ლეხ კაჩინსკის, აწყურის ქუჩისა და კახეთის I შესახვევის გავლით, დადგენილი სქემით იმოძრავებენ. უკუმიმართულებისას, მარშრუტები მეტროსადგური „ისნის“ მიმდებარე ტერიტორიიდან ლეხ კაჩინსკის ქუჩისკენ იმოძრავებენ, რის შემდეგაც, ბუშის ქუჩისა და კახეთის გზატკეცილის გავლით, მოძრაობას დადგენილი სქემით გააგრძელებენ.