EBRD საქართველოს მთავრობის მიერ მნიშვნელოვანი ენერგოეფექტურობის კანონების მიღებას მიესალმება
ევროპის განვითარებისა და რეკონსტრუქციის ბანკი (EBRD) საქართველოს მთავრობის მიერ მნიშვნელოვანი ენერგოეფექტურობის კანონების მიღებას მიესალმება. EBRD-ის შეფასებით, ორი ახალი კანონი - კანონი ენერგოეფექტურობის შესახებ და კანონი შენობების ენერგოეფექტურობის შესახებ - მნიშვნელოვანი ნაბიჯია ღრმა და ყოვლისმომცველი თავისუფალი ვაჭრობის შესახებ ხელშეკრულებით (DCFTA) აღებული მოთხოვნების შესრულების, ასევე ენერგეტიკული თემის წევრობის თვალსაზრისით. ეს არის საერთაშორისო ხელშეკრულება, რომელიც ევროკავშირსა და მის მეზობლებს აერთიანებს პან-ევროპული ენერგეტიკული ბაზრის შესაქმნელად.
ბანკის განცხადებით, კანონები საშუალებას მისცემს საქართველოს გააუმჯობესოს ენერგიის დაზოგვა 14 პროცენტით 2025 წლისთვის, რაც ქვეყანას დაეხმარება შეასრულოს საერთაშორისო ვალდებულებები კლიმატის ცვლილების წინააღმდეგ ბრძოლაში, გაზარდოს ენერგეტიკული უსაფრთხოება და გაამყაროს ენერგეტიკული კავშირები ევროკავშირთან. გარდა ამისა, კანონები ხელს შეუწყობს ენერგო სტანდარტების შესრულების გაუმჯობესებას ახალი მშენებლობებისა და შენობების მოდერნიზაციის კუთხით ევროკავშირის სტანდარტების თანახმად. ინიციატივა, რომელიც წინ უძღოდა ამ კანონებს, კონცეფციის სახით 2015 წლის ბოლოს ჩამოყალიბდა, როდესაც ეკონომიკისა და მდგრადი განვითარების სამინისტრომ დაიწყო ენერგოეფექტურობის ეროვნული სამოქმედო გეგმის (NEEAP) პროექტის შემუშავება EBRD–თან ერთად. ეს პროცესი განხორციელდა შვედეთის საერთაშორისო განვითარების სააგენტოს მხარდაჭერით. NEEAP მიმართულია ისეთ გამოწვევების საპასუხოდ, როგორიცაა ეკონომიკის ენერგეტიკული ინტენსივობის შემცირება - ქვეყნის უწყვეტი ეკონომიკური ზრდისა და საერთაშორისო ვალდებულებების შესრულების პარალელურად. ეს იყო ზომების ერთობლიობა, რომელიც საქართველოს უნდა გაეტარებინა ენერგოეფექტურობის გასაუმჯობესებლად და რომელმაც შექმნა საფუძველი ამ ორი ახალი კანონის მისაღებად, რომლებიც შედგენილია EBRD-ისა და ენერგეტიკის საზოგადოების სამდივნოს მხარდაჭერით. ახალი კანონმდებლობის შესახებ საუბრისას, EBRD-ის კავკასიის რეგიონალური დირექტორმა კატარინა ბიორლინ ჰანსენმა აღნიშნა, რომ ეს უმნიშვნელოვანესი მიღწევაა საქართველოსთვის.
“კანონმდებლობა ქმნის ახალ ინვესტიციურ შესაძლებლობებს მწვანე ტექნოლოგიების გამოყენებით, ამავე დროს, ხელს უწყობს ენერგიის მოხმარებას ეკოლოგიურად უფრო სუფთა წყაროებიდან. ემისიების შემცირება და კლიმატის საფრთხეების შემცირება EBRD–ის სტრატეგიის მნიშვნელოვანი ნაწილია”, - განაცხადა კატარინა ბიორლინ ჰანსენმა.
მის კომენტარს ეხმიანება იურიდიული გარდამავალი პროგრამის უფროსი მრჩეველი ვალსინა ჰარალამპიევა, რომელიც ხელმძღვანელობდა EBRD-ს მუშაობას ენერგოეფექტურობის შესახებ კანონსა და სამოქმედო გეგმაზე.
„ენერგოეფექტურობის შესახებ ახალი კანონების მიღება საქართველოსთვის მნიშვნელოვანი მოვლენაა, აქამდე ქვეყანაში პრაქტიკულად არ არსებობდა რეგულაციები ენერგოეფექტურობის შესახებ და ძალიან მცირე იყო ინვესტიციები ენერგიის მოხმარებაში. სამოქმედო გეგმა, რომელიც მიიღეს 2019 წელს, არის საქართველოს გზავნილი მსოფლიოსათვის, რომ მისთვის პრიორიტეტულია ენერგოეფექტურობის პოლიტიკა და ინვესტიციები, რაც ხელს შეუწყობს მომხმარებლებისთვის გაუმჯობესებული სერვისის მიწოდებას, იზოლირებული სახლების მიერ ნაკლები ენერგიის მოხმარებას და გრძელვადიან პერსპექტივაში - უფრო კონკურენტუნარიან ეკონომიკას”,- აცხადებს ვალსინა ჰარალამპიევა.