კომპანიები, რომლებიც ჩინეთს სრულად ან ნაწილობრივ ტოვებენ

კორონავირუსის პანდემიის ფონზე ათობით ამერიკულმა კომპანიამ გადაწყვიტა, ჩინეთში სხვდასხვა სახის პროდუქტის წარმოებაზე უარი თქვას და ისინი უკან, აშშ-ში ან სამხრეთ-აღმოსავლეთ აზიის რომელიმე ქვეყანაში გადაიტანოს.

აღნიშნული გადაწყვეტილება რამდენიმე კომპანიამ ჯერ კიდევ მარტის დასაწყისში მას შემდეგ მიიღო, რაც ჩინეთში კორონავირუსის პანდემიამ იფეთქა და სწრაფი ტემპით ჯერ მთელს ქვეყანაში, შემდეგ კი მსოფლიოში გავრცელდა.

რამდენიმე თვის განმავლობაში ჩინეთში წარმოება შეჩერდა, ამასთან ბოლო წლებში აშშ-ჩინეთს შორის არსებული სავაჭრო ომის ფონზე ამერიკულმა კომპანიებმა გადაწყვიტეს ჩინეთში წარმოების ნაწილზე უარი ეთქვათ. Forbes-ის ინფორმაციით ასეთი 60-ზე მეტი კომპანიაა.

HP და Dell

ამერიკულმა პერსონალური კომპიუტერების მწარმოებელმა უმსხვილესმა კომპანიებმა HP და Dell-მა გადაწყვიტეს წლის ბოლომდე წარმოების 30% სამხრეთ-აღმოსავლეთ აზიის ქვეყნებში გადაიტანონ.

Apple

ამერიკულმა მულტინაციონალურმა კორპორაცია Apple-მა კი გადაწყვიტა მიმდინარე წლის ბოლომდე ჩინეთში პროდუქციის წარმოება 30-დან 15%-მდე შეამციროს და საკუთარი საწარმოები ინდოეთში გადაიტანოს.

Hasbro Inc

Hasbro Inc უმსხვილესი ამერიკულ-კანადური კომპანიაა, რომელიც ათასობით სახის სათამაშოებსა და სამაგიდო თამაშებს ამზადებს. კომპანიის ქარხნების უმეტესობა ჩინეთში მდებარეობს. მათ დაგეგმილი აქვთ 2020 წლის ბოლომდე ჩინეთში წარმოება 50%-ით შეამცირონ და ახალი ქარხნები ინდოეთსა და ვიეტნამში გახსნან.

აღსანიშნავია, რომ ჩამოთვლილი კომპანიების გარდა ჩინეთში წარმოების შემცირებას ასევე გეგმავენ Samsung, Nintendo, GoPro და კიდევ ათობით სხვა კომპანია. მათი უმეტესობა ქარხნების გადატანას ინდოეთში, ვიეტნამში, მექსიკაში, ტაილანდსა და მალაიზიაში გეგმავს, რადგან აღნიშნულ ქვეყნებში წარმოება გაცილებით ნაკლებ დანახარჯებთანაა დაკავშირებული.