გამოწერილი ნივთების განბაჟების ზღვარმა შესაძლოა, აიწიოს - 300 ლარიან ნივთებზე დამატებით თანხის გადახდა აღარ მოგიწევთ

300 ლარიანი ნივთების გამოწერის შემთხვევაში შესაძლოა, განბაჟება აღარ მოგიწიოთ.

აღნიშნულის შესახებ მოქალაქეთა მოთხოვნა პარლამენტში უკვე წარდგენილია. კერძოდ, საუბარია, 13 070 მოქალაქის (დავით რამიშვილი) მიერ ხელმოწერილ და წარმოდგენილ პეტიციაზე.

ინიციატივაზე ხელმომწერი პირები ითხოვენ, რომ საზღვარგარეთიდან გამოწერილ 300 ლარიან ნივთებს განბაჟებამ აღარ მოუწიოს და ზღვარმა 600 ლარზე აიწიოს.

„300 ლარიანი ზღვარის აწევა არ გამოიწვევს მცირე და საშუალო ბიზნესის ხელის შეშლას, როგორც ამას მთავრობა იძახის და ამ მიზეზით არ სურს ზღვარის აწევა.

1. მცირე ბიზნესის გავითარებას სწორედაც ბაჟის არსებობა უშლის ხელს, რომელიც მცირე ბიზნესმენს იძულებულს ხდის ელემენტარული, მიზერული საქონლის შემოტანის შემთხვევაშიც კი გასწიოს ზომაზე დიდი ხარჯი, რითაც იზრდება, როგორც პროდუქციის ფასი, ისე ბიზნესის დაკარგვასთან დაკავშირებული რისკები, რითაც მცირე ბიზნესმენს რაიმეს წამოწყების სურვილი ეკარგება;

2. საშუალო და დიდი ბიზნესისათვის საფრთხეს არ წარმოადგენს ინდივიდების მიერ შემოტანილი საქონელი, რომელთა მოცულობა საკმაოდ მცირეა;

3. დოლარის მომატებამ ლართან მიმართებაში კიდევ უფრო გაართულა ეს პრობლემა, ადრე თუ 160-170 დოლარის ნივთის შეძენისას 300 ლარს არ გადააჭარბებდი, ახლა - 90 დოლარს ზემოთ უკვე გიწევს განბაჟება;

4. ზღვარის აწევა, გაზრდის საქონლის მრავალფეროვნებას და გააძლიერებს კონკურენციას, რაც დაარეგულირებს ფასებს და ხარისხს, ვფიქრობთ, ეს მისაღები უნდა იყოს ხელისუფლებისათვის

5. ჩვენ, არ ვითხოვთ, ბაჟის საერთოდ გაუქმებას, მოხდეს დაწესებული 300 ლარიანი ზღვარის აწევა 600 ლარამდე ( 2009 წლის აგვისტომდე ზღვარი იყო 1500 ლარი),“-აღნიშნულია პეტიციაში.

პარლამენტის ბიუროს გადაწყვეტილებით, მოქალაქეთა მოთხოვნას საზღვარგარეთიდან გამოწერილი ნივთების განბაჟებასთან დაკავშირებით, საფინანსო-საბიუჯეტო კომიტეტი განიხილავს და გადაწყვეტილებას ბიუროს აცნობებს.