საქართველო 4 000 ფლაკონ რემდესივირს ყიდულობს
საქართველო 4 000 ფლაკონ რემდესივირს ყიდულობს. ამის შესახებ გამარტივებული შესყიდვა „ინფექციური პათოლოგიის შიდსისა და კლინიკური იმუნოლოგიის სამეცნიერო-პრაქტიკულ ცენტრს" აქვს გამოცხადებული.
წინადადება ამ ეტაპზე განხილვის პროცესშია. შესყიდვის ღირებულება კი - 104 000 აშშ დოლარია.
„კორონა ვირუსით ინფიცირებულთა რაოდენობა ქვეყანაში საკმაოდ მაღალია და ამასთან ყოველდღიურად იმატებს ახალი შემთხვევების რაოდენობა. შესაბამისად მაღალია დაავადების თანმხლები გართულებების გამოვლენა და რიგ შემთხვევებში აუცლებელია პაციენტების ჰოსპიტალიზება. covid 19-ის დადასტურებულად ეფექტიანი პირდაპირი მოქმედების ანტივირუსული მკურნალობა ჯერჯერობით არ არსებობს, თუმცა მსოფლიო გამოცდილებით და სხვადასხვა კვლევის შედეგებზე დაყრდნობით ამ ეტაპისთვის ყველაზე ეფექტიან და იმედისმომცემ მედიკამენტად ითვლება მედიკამენტი - რემდესივირი, რომელსაც შეუძლია შეამსუბუქოს დაავადების მიმდინარეობა და შეამციროს ლეტალობა. საქართველოში, ისევე როგორც მთელს მსოფლიოში, ბოლო პერიოდში აღინიშნება covid 19-ის შემთხვევების, მათ შორის მძიმე და კრიტიკულად მძიმე პაციენტების მნიშვნელოვანი მატება. აგრეთვე სიკვდილიანობის შემთხვევების ზრდა. შესაბამისად, რემდესივირის შემოტანა ქვეყნისთვის სასიცოცხლოდ მნიშვნელოვანია,“-აღნიშნულია განაცხადში.
პრეპარატის მოწოდება ხელშეკრულების გაფორმებიდან არაუგვიანეს 3 კვირის განმავლობაში უნდა განხორციელდეს.
