„მოლოდინი იყო რომ ბინებზე ფასები დაიწევდა, თუმცა...“ - როგორ იმოქმედა უძრავი ქონების ბაზარზე პანდემიამ

მიუხედავად მოლოდინისა, რომ პანდემიურ პერიოდში უძრავ ქონებაზე ფასები მეტ-ნაკლებად შემცირდებოდა, ეს ასე არ მოხდა - აცხადებს „ბიზნესპრესნიუსთან“ საუბრისას „საქართველოს უძრავი ქონების ეროვნული ასოციაციის“ მმართველი საბჭოს წევრი ვაჟა მებაღიშვილი.

სპეციალისტი ზოგადად ბაზარზე არსებულ სიტუაციაზეც საუბრობს და თვლის, რომ დღეს იმის პროგნოზირება, თუ როდის დაუბრუნდება უძრავი ქონების ბაზარი პანდემიამდე არსებულ მდგომარეობას, ძალიან რთულია.

SS.ge-ზე განთავსებული განცხადებების მიხედვით, დედაქალაქში მეორად უძრავ ქონებაზე ფასები 400 დოლარიდან იწყება და 1000 დოლარამდე ადის, მშენებარე ბინების ფასი კი 500-1500 დოლარის ფარგლებში მერყეობს (ფასები მოცემულია ერთი კვ/მეტრის მიხედვით). ტრადიციულად, ქალაქის ცენტრში ბინები უფრო ძვირი ღირს, ვიდრე გარეუბნებში და ეს ეხება, როგორც ახალ, ასევე მეორად უძრავ ქონებას.

შეგახსენებთ, კორონავირუსის პანდემიის გამო სახელმწიფომ დეველოპერული და სამშენებლო სექტორის მხარდასაჭერად სუბსიდირების პროგრამა შეიმუშავა, რაც ხუთი წლის განმავლობაში იპოთეკური სესხის წლიური საპროცენტო განაკვეთის მაქსიმუმ 4%-ის დაფინანსებას გულისხმობს. სპეციალისტების შეფასებით, მიუხედავად სუბსიდირების პროგრამის ამოქმედებისა, ხალხი ბინის ყიდვისგან თავს იკავებს, რადგან ვითარება არაპროგნოზირებადია.

როგორც უძრავი ქონების სააგენტო „კიბეს“ ხელმძღვანელმა ნელი გოგუაძემ „ბიზნესპრენიუსთან“ საუბრისას განაცხადა, მოთხოვნა განსაკუთრებით ძველ ბინებზე შემცირდა.

„მიუხედავად სუბსიდირების პროგრამის ამოქმედებისა, ეს წელი გაყიდვების კუთხით შემცირების ტენდენციით ხასიათდება, განსაკუთრებით ძველ ბინებზე. ჩვენც სუბსიდირების ფარგლებში რამდენიმე ბინა გავყიდეთ, მაგრამ საერთო ჯამში, წინა წელთან შედარებითმ ტენდეცია საკმაოდ შემცირებულია, განსაკუთრებით დიდ ბინებზე. დიდ ბინებში ითვლება 150 კვადრატულ მეტრ ფართობზე მეტი, ხოლო ძირითადი მოთხოვნა 80 კვადრატულზეა.

გარეუბნებში, მე ვარკეთილთან მაქვს შეხება და ბინებს გაყიდვები, შედარებით არ უჭირს. ვარკეთილში თეთრ კარკას 500-600 დოლარის ფარგლებში მერყეობს. რა თქმა უნდა, გაყიდვებზე ფასი დიდ გავლენას ახდენს. მაგალითად, საბურთალოზე ყველაზე მინიმალური ფასი 850 დოლარია.“ - აღნიშნა გოგუაძემ.

მისივე თქმით, ქვეყანაში და მსოფლიოში მიმდინარე პროცესები ბინის გაყიდვებზე პირდაპირპროპორციულად მოქმედებს: „უძრავი ქონების ბიზნესს მკვეთრად გამოხატული სეზონურობა არ ახასიათებს. ჩემი მრავალწლიანი გამოცდილებიდან გამომდინარე დეკემბერში, ახალწლის წინა დღეებშიც გაგვიყიდია ბინები. შესაბამისად, მკვეთრად გამოხატული სეზონურობა არ ახასიათებს.

დღეს ძალიან არასტაბილური მდგომარეობაა. როგორც კი ლარი დევალვაციას განიცდის, მოთხოვნები მაშინვე ჩერდება. ყურადღებას აქცევენ ლარი როგორ დასტაბილურდება. გაყიდვები რომ გაიზარდოს, ფასიც უნდა იყოს სტაბილური და ვალუტაც უნდა იყოს სტაბილური. შესაბამისად, კურსის ცვალებადობა ძალიან მნიშვნელოვანია. ასევე მოთხოვნებზე, ქვეყნის ეკონომიკური და პოლიტიკური მდგომარებაც მოქმედებს. რა თქმა უნდა, ამას კორონავირუსიც ემატება, ამიტომ ადამიანები ყიდვისგან თავს იკავებენ, რადგან არ იციან მომავალში რა იქნება“, - განაცხადა გოგუაძემ.

„საქართველოს უძრავი ქონების ეროვნული ასოციაციის“ მმართველი საბჭოს წევრი და უძრავი ქონების კომპანია „ნოუბლ რიალ ისთეითის“ დირექტორი ვაჟა მებაღიშვილი „ბიზნსპრესნიუსთან“ საუბრისას აცხადებს, რომ ხალხს ფასის დაკლების მოლოდინები ჰქონდათ, თუმცა ფასები სტაბილურობას ინარჩუნებს.

„გასულ კვარტალში მოთხოვნები გააქტიურდა, თუმცა მოთხოვნები აცდენილია იმ ნაწილში, რომ ხალხს ფასის დაკლების მოლოდინები ჰქონდათ, მაგრამ ფასები სტაბილურობას ინარჩუნებენ. წინა თვეებში ანალიზი კეთდებოდა. როგორც წესი ეს კვლევები რეალობას აცდა და საბოლოო ჯამში სულ სხვა სურათი დაიდო.

რაც შეეხება სუბსიდირებას, ახალაშენებული სახლების შემთხვევაში, ძალიან კარგი ეფექტი იქონია, მაგრამ ნეგატიური ეფექტიც ჰქონდა, რადგან მეორადი უძრავი ქონება ამ კუთხით ძალიან დაიჩაგრა. მოთხოვნა ისედაც დაბალი იყო და ამ პერიოდის განმავლობაში ფაქტობრივად, გაჩერდა. ისედაც მცირდებოდა და ისედაც დარტყმის ქვეშ იყო.

რაც შეეხება ისტორიულ უბანს, იქ მაღალი იყო მოთხოვნა, მაგრამ ტურიზმის სექტორის ამ ვითარებამ ეს პროცესი შეაჩერა.“- განაცხადა მებაღიშვილმა.

მისივე თქმით, „პროგნოზი კეთდება, რომ უძრავი ქონების ბაზარი ძველ ნიშნულს 2024 წელს დაუბრუნდება, თუმცა ამაზე საფუძვლიანად ვერ ვისაუბრებ, რადგან ეს წინასწარი პროგნოზები რეალობას ცდება. რადგან ჩვენ გამჭვირვალე სისტემა არ გვაქვს, სადაც ყველაფერი იქნება აღრიცხული“, - აღნიშნა მებაღიშვილმა.

მებაღიშვილის განცხადებით, კორონავირუსის პანდემიის შედეგად ქვეყანაში და მსოფლიოში განვითარებული მოვლენები უძრავი ქონების ბაზარზე უარყოფითად მოქმედებს. ამიტომ სპეციალისტი სახელმწიფოს მოუწოდებს, რომ აღნიშნულ ბიზნესში უფრო აქტიურად ჩაერთოს.

ლიკა ამირაშვილი