კობა გვენეტაძის განცხადებით, საბანკო სექტორის ზარალი ოქტომბრის მდგომარეობით, 85 მლნ ლარია

საქართველოს ეროვნული ბანკის პრეზიდენტის, კობა გვენეტაძის განცხადებით, საბანკო სექტორის ზარალი ოქტომბრის მდგომარეობით, 85 მილიონი ლარია. როგორც მან აღნიშნა, შესაძლოა სექტორი წლიურ ჭრილში 50-100 მილიონი ლარის ფარგლებში მოგებაზე გავიდეს.

კობა გვენეტაძემ საკრედიტო პორტფელის მაჩვენებლებზეც ისაუბრა და აღნიშნა, რომ სესხების გადავადების მეორე ეტაპზე საკრედიტო პორტფელის 25%-ზე მეტი გადავადდა.

„გადავადების მეორე ტალღის დროს ივლის-აგვისტოში, ბანკებმა ინდივიდუალური მიდგომით მოახდინეს გადავადება მათთვის, ვინც სამსახური დაკარგა. მეორე ფაზის დროს საკრედიტო პორტფელის 25%-ზე მეტი გადავადდა. რაც შეეხება სხვა მაჩვენებელებს, მიმდინარე პერიოდში 30 დღეზე მეტი ვადაგადაცილებული სესხების წილი პორტფელში მაღალი არაა, 2.5%-ია და კოვიდამდე პერიოდის მაჩვენებელთან შედარებით ძალიან არ გაზრდილა, რადგან ბანკები რესტრუქტურიზაციას სთავაზობენ მსესხებლებს და გადახდის გრაფიკს უცვლიან. შედეგად, რესტრუქტურიზირებული სესხები გაიზარდა და ოქტომბრის მდგომარეობით 11.6% შეადგინა.

დღეს არსებული მონაცემებით, უმოქმედო სესხების წილი პორტფელში 7.6%-ია და გაზრდილია კოვიდამდე პერიოდთან შედარებით. ვფიქრობთ, მომავალში ეს მაჩვენებელი კიდევ გაიზრდება და 10%-ს მიაღწევს“,-აღნიშნა კობა გვენეტაძემ.