საგამოძიებო სამსახურმა ოქტომბერ-ნოემბრის პერიოდში უაქციზო სიგარეტის შენახვა-გადაზიდვა-რეალიზაციის 43 ფაქტი გამოავლინა
საგამოძიებო სამსახურმა ოქტომბერ - ნოემბრის პერიოდში უაქციზო სიგარეტის შენახვა-გადაზიდვა-რეალიზაციის 43 ფაქტი გამოავლინა.
როგორც საქართველოს ფინანსთა სამინისტროს საგამოძიებო სამსახურიდან იუწყებიან, ამოღებულია სარეალიზაციოდ განკუთვნილი, სხვადასხვა დასახელების 73 608 კოლოფი უაქციზო სიგარეტი.
„საქართველოს ფინანსთა სამინისტროს საგამოძიებო სამსახურის თანამშრომლებმა 2020 წლის ოქტომბერ-ნოემბრის პერიოდში, საქართველოს მასშტაბით გატარებული ოპერატიულ-სამძებრო ღონისძიებებისა და საგამოძიებო მოქმედებების შედეგად, გამოავლინეს მარკირებას დაქვემდებარებული აქციზური საქონლის აქციზური მარკის გარეშე შენახვა-გადაზიდვა-რეალიზაციის 43 ფაქტი.
გამოძიების პროცესში, დანაშაულში მხილებული პირებისგან ამოღებულია სარეალიზაციოდ განკუთვნილი, სხვადასხვა დასახელების 73 608 კოლოფი უაქციზო სიგარეტი, რომლის საერთო საბაზრო ღირებულება 300 000 ლარს აღემატება.
აღნიშნული დანაშაულის ჩადენისათვის, გამოძიების ამ ეტაპზე, ბრალდებულის სახით პასუხისგებაში მიეცა 24 პირი, რომელთაგან 8 დაკავებულია“,-აღნიშნავენ უწყებაში.