ეკატერინე ტიკარაძე - ბიზნესთან კომუნიკაციის შემდეგ მივიღებთ გადაწყვეტილებებს, თუ რა მასშტაბის იქნება შეზღუდვების მოხსნა 24 დეკემბრის შემდეგ
ჯანდაცვის მინისტრის მოვალეობის შემსრულებლის, ეკატერინე ტიკარაძის განცხადებით, კორონავირუსით ინფიცირებულთა რიცხვის შეჩერებული ზრდა მთავრობას მხოლოდ ფრთხილი ოპტიმიზმის საფუძველს აძლევს.
როგორც მან დღევანდელ ბრიფინგზე განმარტა, ხელისუფლება ბიზნესთან კომუნიკაციის შემდეგ მიიღებს გადაწყვეტილებებს, თუ რა მასშტაბის იქნება შეზღუდვების მოხსნა 24 დეკემბრის შემდეგ.
„ინფექციის შეჩერებული ზრდა მხოლოდ ფრთხილი ოპტიმიზმის საფუძველს გვაძლევს და სხვას არაფერს. ეს არ არის არანაირი შედეგი. ამით ჩვენ არ გვაქვს უფლება ვისაუბროთ იმაზე, რომ უკვე ცალსახად ინფექციის კლება გვაქვს. ამიტომ, შეიძლება იყოს შეზღუდვები მაქსიმალურად გაფართოებული. ძალიან ფრთხილები ვიქნებით ჩვენს გადწყვეტილებაში. მნიშვნელოვანი იქნება ეკონომიკის სამინისტოს და ეკონომიკური გუნდის კომუნიკაცია ბიზნესთან, რომელიც დღეს, ხვალ და შემდეგ დღეებში გაიმართება. ასევე, აქ ჩართული არის შრომითი უსაფრთხოების სამსახური, რომელიც როგორც რეგულაციების კუთხით, ასევე შემდგომი კონტროლის თვალსაზრისით არის ამ პროცესში ჩართული. ბიზნესთან კომუნიკაციის შემდეგ, ჩვენ მივიღებთ გადაწყვეტილებებს, თუ რა მასშტაბის იქნება შეზღუდვების მოხსნა 24 დეკემბრის შემდეგ“,-განაცხადა ტიკარაძემ.