რა შეზღუდვა დარჩება ძალაში და რა მოიხსნება ორ დღეში

კორონავირუსის გამო დაწესებული შეზღუდვები 24 დეკემბრიდან 2 იანვრამდე პერიოდში სრულად აღარ მოიხსნება.

ამის შესახებ, დღეს საკოორდინაციო საბჭოს შემდეგ გამართულ ბრიფინგზე გახდა ცნობილი. კერძოდ, გთავაზობთ ჩამონათვალს, თუ რა შეზღუდვა დარჩება კვლავ ძალაში და რა შეზღუდვა მოიხსნება 24 დეკემბრიდან.

  • 24 დეკემბრიდან 2 იანვრამდე დიდ ქალაქებში - თბილისში, რუსთავში, ქუთაისში, ბათუმში, გორში, ზუგდიდში, ფოთსა და თელავში საზოგადოებრივი ტრანსპორტის გადაადგილების შეზღუდვა ძალაში რჩება;
  • კვლავ აკრძალული იქნება საქალაქთაშორისო ტრანსპორტის მოძრაობა;
  • 21:00 საათიდან დილის 05:00 საათამდე დაწესებული გადაადგილების შეზღუდვა კვლავ ძალაში რჩება. გამონაკლისი მხოლოდ ახალ წელს (31 დეკემბერს) და შობას (7 იანვარს) დაიშვება;
  • 24 დეკემბრიდან ბაზრობები არ გახსნება. იმუშავებენ აგრარული ბაზრები, თუმცა უსაფრთხოების წესების დაცვით.
  • 24 დეკემბრიდან 2 იანვრის ჩათვლით სავაჭრო ობიექტები მუშაობას განაახლებენ, თუმცა, რიგი წესების დაცვა დასჭირდებათ.

სამუშაო საათები - 07:00 სთ-დან - 19:00 სთ-მდე;

დაცული უნდა იყოს მომხმარებლის ნაკადები, ამისთვის მაღაზიების ფართის ყოველ 20 კვადრატულ მეტრზე არაუმეტეს 1 ადამიანი დაიშვება;

როგორც შიდა, ისე გარე პერიმეტრზე უნდა მოხდეს რიგების მკაცრი დაცვა;

ფასდაკლებების აქცია ან დილის საათებში ან ონლაინ გაყიდვების დროს უნდა გამოცხადდეს;

არ იმუშავებს გასახდელი;

მაღაზიამ უნდა დაუშვას პროდუქციის დაბრუნება-გადაცვლა 1 თვის განმავლობაში და ეს 1 თებერვლიდან უნდა მოხდეს;

სავაჭრო ცენტრებში კვების ობიექტების ფუნქციონირება, მათ შორის გატანით, იკრძალება;

პირბადის მოხმარება უნდა იყოს დაცული.

  • ქვეყნის მასშტაბით, სასტუმროებში არსებული რესტორნები 21:00 საათამდე იმუშავებენ, ამის შემდეგ კი მხოლოდ ნომერში მომსახურების სერვისი იქნება დაშვებული (სამთო-სათხილამურო კურორტებზე კი სასტუმროები კვლავ მხოლოდ კოვიდ სასტუმროების სტატუსით გააგრძელებენ მუშაობას)

თაია არდოტელი