დანიაში „ვაქცინაციის პასპორტები“ შემოდის

დანიაში მიმდინარე თვეში ე.წ. „ვაქცინაციის პასპორტები“ შემოვა, - The Guardian-ის ინფორმაციით, ამის შესახებ ქვეყნის ჯანდაცვის სამინისტროში განაცხადეს.

მათივე ინფორმაციით, მოქალაქეებს, რომლებსაც კორონავირუსის საწინააღმდეგო ვაქცინა ჩატარებული აქვთ, შესაძლებლობა ექნებათ, გადმოწერონ და ამობეჭდონ დოკუმენტი, რომელიც დაადასტურებს, რომ კოვიდ 19-ის წინააღმდეგ აცრილები არიან.

„დანიის ვაქცინის პასპორტის მიზანია უზრუნველყოს, რომ თქვენ, როგორც მოქალაქემ, მარტივად და უსაფრთხოდ შეძლოთ იმის დადასტურება, რომ ვაქცინაცია ჩატარებული გაქვთ, მათ შორის იმ შემთხვევაშიც, თუკი საზღვარგარეთ მიემგზავრებით და აღნიშნული დოკუმენტი საჭიროა,“- აცხადებენ სამინისტროში.

ცნობისათვის, დანიაში, პანდემიის გავრცელების დროიდან, კორონავირუსის 178 497 შემთხვევაა დადასტურებული, გამოჯანმრთელებულია 149 346 და დაღუპულია 1 517 ადამიანი.