ერთ წელიწადში სახელმწიფო საგარეო ვალი 1,794 მლრდ დოლარით გაიზარდა

ერთ წელიწადში საქართველოს სახელმწიფო საგარეო ვალი 1,794 მლრდ დოლარით გაიზარდა. ეს არის ყველაზე დიდი ზრდა, რაც ბოლო წლების განმავლობაში დაფიქსირებულა.

ფინანსთა სამინისტროს მიერ გამოქვეყნებული მონაცემების მიხედვით, 2020 წლის დეკემბრის მდგომარეობით, საქართველოს სახელმწიფო საგარეო ვალი შეადგენს 7,535 მლრდ დოლარს (დღევანდელი კურსით 24, 689 მლრდ ლარს). 2019 წლის დეკემბრის მდგომარეობით კი, ვალის მოცულობა 5,741 მლრდ დოლარი იყო (მაშინდელი კურსით 16,463 მლრდ ლარი).

არსებული 7,535 მლრდ დოლარიდან 7,162 მლრდ დოლარი სამთავრობო ვალია, 373 მლნ დოლარი კი ეროვნული ბანკის.

აღსანიშნავია, რომ 2020 წელს გაიზარდა ეროვნული ბანკის ვალიც. კერძოდ, დეკემბერში სებ-ის ვალი შეადგენდა 373 მლნ დოლარს, 2019 წლის დეკემბერში კი 248,9 მლნ დოლარს.