თბილისის ქუჩების დამისამართება დაიწყო

თბილისის 2021 წლის ბიუჯეტით გამოყოფილი თანხების ფარგლებში მისამართის აღმნიშვნელი აბრების მონტაჟი წელს გლდანში, ვლადიმერ ჯანჯღავას ქუჩიდან დაიწყო. ამის შესახებ ინფორმაციას თბილისის საკრებულო ავრცელებს.

მათივე ინფორმაციით, ვლადიმერ ჯანჯღავას ქუჩაზე სამისამართე აბრების განთავსების პროცესში მონაწილეობა საკრებულოს სახელდებისა და სიმბოლიკის კომისიის თავმჯდომარემ მიხეილ ამაშუკელმა, გლდანის რაიონის მაჟორიტარ დეპუტატთან შალვა ოგბაიძესთან ერთად მიიღო.

,,აბრების სამონტაჟო სამუშაოები ყოველწლიურად 15 000 მდე მისამართზე ხორციელდება და მისასალმებელია, რომ პანდემიის პირობებშიც ამ მიმართულებით შეფერხება არ გვაქვს. სრულყოფილი და თანამედროვე დამისამართება უმნიშვნელოვანესი კომპონენტია ისეთი სერვისების ოპერატიულად მისაღებად, როგორიცაა სასწრაფო, სახანძრო, საპატრულო, სამაშველო თუ საფოსტო მომსახურებები. აღნიშნულ სერვისებს კი ხშირად სასიცოცხლო მნიშვნელობა აქვთ,“-განაცხადა საკრებულოს სახელდებისა და სიმბოლიკის კომისიის თავმჯდომარემ და აღნიშნა, რომ დამისამართება აქტიურად გაგრძელდება.

გლდანის (ავჭალის) რაიონის მაჟორიტარი დეპუტატის, შალვა ოგბაიძის თქმით, საკრებულოს სამაჟორიტარო ბიუროებს სხვადასხვა რაიონის მცხოვრებლები ხშირად ამა თუ იმ ქუჩის დამისამართების თხოვნით მიმართავენ, გროვდება ინფორმაცია აბრების განახლებისა თუ მათი ჩანაცვლების შესახებ, რაც წლის განმავლობაში ხორციელდება. მაჟორიტარმა საკრებულოს სახელდებისა და სიმბოლიკის კომისიას, მერიის შესაბამის სამსახურს, ასევე კონტრაქტორ კომპანიასა და მასში დასაქმებულ ადამიანებს მადლობა გადაუხადა.