ეკატერინე ტიკარაძე კლინიკების ხელმძღვანელებს შეხვდა

ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრი ეკატერინე ტიკარაძე სამედიცინო დაწესებულებების ხელმძღვანელებს შეხვდა.

ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს ცნობით, მხარეებმა არსებული გამოწვევების გადაჭრის გზებზე ერთობლივად იმსჯელეს.

მათივე ინფორმაციით, შეხვედრის მონაწილეებმა მინისტრს კლინიკებში არსებული პრობლემები პირადად გააცნეს. შეხვედრაზე საუბარი შეეხო, სელექტიური კონტრაქტირების პირობებს, კლინიკების ფინანსურ საჭიროებებსა და კომუნალური გადასახადების სუბსიდირების საკითხს.

„კლინიკების ხელმძღვანელებთან იმ პრობლემებზე ვიმსჯელეთ, რომლის წინაშეც ისინი დგანან. ეს გარკვეულწილად სახარჯი მასალების თანხების მატებასა და კომუნალური გადასახადების ზრდას უკავშირდება. კოვიდ პანდემიის პირობებში პაციენტთა რეგულარული ნაკადების შენარჩუნება რთული იყო, რაც კლინიკების შემოსავლებზე აისახა. ამ პირობებში მნიშვნელოვანია, კლინიკებისთვის გრძელვადიანი ხედვის განსაზღვრა. ჯანდაცვის სამინისტრო მზადაა იმისთვის, რომ ეს პროცესი ინტენსიურ რეჟიმში გაგრძელდეს. მნიშვნელოვანია ასევე ისიც, რომ ამ კონსულტაციების საფუძველზე მოიძებნოს მექანიზმი, რათა მოხდეს გარკვეული კომუნალური გადასახადების სუბსიდირება“,- განაცხადა ჯანდაცვის მინისტრის მოადგილემ, თამარ გაბუნიამ.

„ევექსი ჰოსპიტლების“ გენერალური დირექტორის გიორგი მინდიაშვილის განცხადებით, მინისტრთან პრინციპულ საკითხებზე შეთანხმება მოხდა.

„შევთანხმდით ძირითად პრინციპულ საკითხებზე და გადავდივართ სამუშაო რეჟიმზე. მინისტრისგან მივიღეთ დაპირება, რომ ეკონომიკურ გუნდთან ელექტროენერგიის გაძვირებული ტარიფის სუბსიდირების საკითხთან დაკავშირებით მოხდება შეთანხმება. ასევე შევთანხმდით სამუშაო ჯგუფის შექმნაზეც, რათა მოხდეს ფასთა ინდექსაციის მექანიზმის შემუშავება“, - აღნიშნა „ევექსი ჰოსპიტლების“ გენერალურმა დირექტორმა გიორგი მინდიაშვილმა.

შეხვედრას 20-მდე სამედიცინო სფეროს წარმომადგენელი ესწრებოდა.