რა სანქციები დაეკისრებათ რესტორნებს თვითნებურად გახსნის შემთხვევაში - შრომის პირობების ინსპექტირების დეპარტამენტი
თვითნებურად გახსნის შემთხვევაში რესტორნები დაჯარიმდებიან - ამის შესახებ შრომის პირობების ინსპექტირების დეპარტამენტის უფროსმა ბექა ფერაძემ განაცხადა.
მისი თქმით, იმ შემთხვევაში, თუ რესტორნებმა მუშაობა თვითნებურად გაანახლეს, ჯარიმა 10 000 ლარი იქნება.
„ჩვენ აქტიურად ვართ ჩართული სხვადასხვა სექტორული მიმართულებით ბიზნესთან კომუნიკაციაში. მე პირადი სატელეფონო კომუნიკაცია მაქვს მათთან და იმედი მაქვს, რომ კვირის განმავლობაში კონსენსუსამდე მივალთ და ასეთი რადიკალური ზომები მიღებული არ იქნება მათი მხრიდან, ვინაიდან ამის საფუძველი არ არსებობს. თუ ამის უკიდურესი აუცილებლობა დადგება და იმედი მაქვს, რომ ამ დონეზე არ მივა ჩვენი ურთიერთობა, სანქციები, ბუნებრივია, იქნება გამოყენებული. ესაა 2 000 ლარი ფიზიკური პირის, ხოლო 10 000 ლარი იურიდიული პირის მიმართ, ხოლო განმეორება იწვევს სისხლის სამართლებრივ პასუხისმგებლობას, რაც ასევე იწვევს ობიექტის დალუქვას“,- აღნიშნა მან.
შეგახსენებთ, რომ რესტორნების ნაწილი შაბათს, 6 თებერვალს თვითნებურად გახსნას გეგმავს. ამ ფაქტს უკვე გამოეხმაურა ეკონომიკისა და მდგრადი განვითარების მინისტრი. ნათია თურნავამ რესტორნებს მოუწოდა, რომ „დიალოგი არ გაართულონ“.