ბრენდები, რომლებიც თბილისის ძირითადი სავაჭრო ქუჩებიდან გავიდნენ

„პანდემიის პერიოდში რეგისტრირებული კონტრაქტების საშუალო შეწონილი იჯარა 36%-ით ნაკლებია 2019 წლის მაჩვენებელზე“.

ამის შესახებ, Colliers International Georgia-ს მიერ გამოქვეყნებულ კომერციული ბაზრის 2020 წლის შეჯამებაშია აღნიშნული.

„პანდემიის პერიოდში რეგისტრირებული კონტრაქტების საშუალო შეწონილი იჯარა 36%-ით ნაკლებია 2019 წლის მაჩვენებელზე. აღნიშნულმა მაჩვენებელმა დრამატული, 50%-იანი კლება განიცადა აღმაშენებლის გამზირზე, კვ.მ-ზე 25.8 აშშ დოლარიდან 12.8 აშშ დოლარამდე. მნიშვნელოვანი, 40%-იანი კლება დაფიქსირდა რუსთაველის გამზირზე და საშუალო შეწონილი იჯარა კვ.მ-ზე 19.6 აშშ დოლარს შეადგენდა. საშუალო შეწონილი იჯარა 38%-ით შემცირდა პეკინზე, მაშინ როცა აღნიშნულმა მაჩვენებელმა მხოლოდ 3%-ით დაიკლო ჭავჭავაძის გამზირზე,“-ვკითხულობთ კვლევაში.

კვლევის ავტორთა ცნობით, თბილისის ძირითადი სავაჭრო ქუჩები 2020 წელს 169 მოიჯარემ დატოვა და გამოთავისუფლებული ობიექტების ჯამურმა ფართმა 11,385 კვ.მ შეადგინა. როგორც Colliers International Georgia-ს კვლევაშია აღნიშნული, ვაკანტური ფართის 57% მდებარეობდა ჭავჭავაძისა და აღმაშენებლის გამზირებზე. Dunkin’ Donuts, OVS kids, Parfois, Flo, Finca Bank არიან იმ მოიჯარეებს შორის, რომლებიც გასულ წელს თბილისის ძირითადი სავაჭრო ქუჩებიდან გავიდნენ.