კომერციულ ბანკებში 27,769 მლრდ ლარის საცხოვრებელი ფართია დატვირთული - Top-5 ბანკი
სესხის მისაღებად ბანკების სასარგებლოდ 27,769 მილიარდი ლარის უძრავი ქონება, კერძოდ, საცხოვრებელია დატვირთული. ამის შესახებ მონაცემები კომერციული ბანკების 2020 წლის მე-4 კვარტლის ფინანსურ ანგარიშგებებშია მოცემული.
კერძოდ, ანგარიშგების თანახმად, მოთხოვნის უზრუნველყოფის მიზნით ყველაზე მეტი - 12,2 მლრდ ლარის საცხოვრებელი ფართია დატვირთული „საქართველოს ბანკში“. შემდეგ მოდის „თიბისი ბანკი“, რომლის სასარგებლოდაც 2020 წლის მდგომარეობით ჯამში, 9,614 მლრდ ლარის ღირებულების საცხოვრებელი ფართია დატვირთული, ხოლო მე-3 ადგილზეა „ვითიბი ბანკი“ 1,634 მლრდ ლარით.
Top-5 ბანკი, სადაც სესხის სანაცვლოდ ყველაზე მეტი საცხოვრებელი სახლია დატვირთული:
- „საქართველოს ბანკი“ – 12 277 450 100 ლარი
- „თიბისი ბანკი“ – 9 614 293 806 ლარი
- „ვითიბი ბანკი“ – 1 634 247 416 ლარი
- „ტერა ბანკი“ – 1 589 460 740 ლარი
- „ლიბერთი ბანკი“ – 962 056 302 ლარი
რაც შეეხება 2019 წელს, მაშინ სესხის მისაღებად ბანკების სასარგებლოდ 22,610 მილიარდი ლარის უძრავი ქონება იყო დატვირთული.
ცნობისათვის, საანგარიშო პერიოდში ბაზარზე 15 კომერციული ბანკი ოპერირებდა.