თურქეთიდან ბანანის ერთ-ერთი წამყვანი იმპორტიორი საქართველო ხდება - რა მოცულობით და რომელი ქვეყნებიდან ვყიდულობთ პროდუქტს
თურქეთიდან ბანანის ერთ-ერთი წამყვანი იმპორტიორი საქართველო ხდება. ამასთან, თურქული პროდუქტის მომხმარებელ ქვეყნებს შორისაა, სირია, საფრანგეთი და ჩრდილოეთ კვიპროსი.
როგორც East fruit-ი სააგენტო Anadolu-ზე დაყრდნობით წერს, თურქეთში ბანანის წარმოება 2020 წელს, 2019 წელთან შედარებით, 32,8% -ით გაიზარდა და 728,133 ტონა შეადგინა.
რაც შეეხება ექსპორტს, შედარებისთვის, თუ 2016 წელს თურქეთმა 11 ტონა ბანანი გაიტანა, 2020 წელს ეს მაჩვენებელი 22,4 ტონამდე გაიზარდა.
აქვე აღსანიშნავია, რომ 2023 წლისთვის, თურქეთი მთლიანად შეაჩერებს ბანანის იმპორტს და შიდა ბაზარს 100%-ით ადგილობრივი პროდუქტით უზრუნველყოფს. ამასთან, უცხოეთის ბაზრების ათვისებას უფრო აქტიურად გეგმავს.
„ბიზნესპრესნიუსი“ დაინტერესდა, რა მოცულობის და რომელი ქვეყნებიდან ყიდულობს საქართველო ბანანს.
სტატისტიკის ეროვნული სამსახურის მონაცემებით, 2020 წელს საქართველომ მსოფლიოს 11 ქვეყანაში 17,624 მლნ დოლარის ღირებულების ბანანი იყიდა. ხოლო, 2019 წელს - 21,365 მლნ დოლარის.
ქვეყნების ჩამონათვალი, საიდანაც პროდუქტის იმპორტი განხორციელდა, ასე გამოიყურება:
ეკვადორი - 15,966 მლნ აშშ დოლარი
თურქეთი - 1,438 მლნ აშშ დოლარი
აშშ - 148.21 მლნ აშშ დოლარი
სომხეთი - 36 100 აშშ დოლარი
კოსტა-რიკა - 25 430 აშშ დოლარი
ნიდერლანდი - 6 500 აშშ დოლარი
საბერძნეთი - 1 820 აშშ დოლარი
გერმანია - 400 აშშ დოლარი
პოლონეთი - 230 აშშ დოლარი
ნიგერია - 190 აშშ დოლარი
რუსეთი - 100 აშშ დოლარი
რაც შეეხება მიმდინარე წლის იანვარს, ერთ თვეში საქართველომ 1,423 მლნ აშშ დოლარის ბანანი შეიძინა, აქედან 1,329 აშშ დოლარის ეკვადორიდან, 93 410 აშშ დოლარის - თურქეთიდან, ხოლო, 550 აშშ დოლარის - ნიდერლანდიდან.
