2020 წელს საჩივრების 51% ინტერნეტ-მომსახურებაზე შემოვიდა - კომუნიკაციების ომბუდსმენის აპარატი
2018 წელს ჩვენს სამსახურში 413 განცხადება-საჩივარი შემოვიდა, 2019 წელს 714, ხოლო 2020 წელს 822 განცხადება-საჩივარი შემოვიდა - ამის შესახებ, რადიო "პალიტრასა“ და ,,პალიტრანიუსის“ გადაცემაში ,,საქმე“ კომუნიკაციების მარეგულირებელ კომისიასთან არსებული მომხმარებელთა ინტერესების საზოგადოებრივი დამცველმა ელენე მიროტაძემ ისაუბრა.
მისი თქმით, რიცხვები მაინც არ ასახავს რეალობას, ამიტომ სამსახური მომხმარებლის ცნობიერების ამაღლების კუთხით აქტიურ კამპანიას აწარმოებს.
,, ჩვენი ძირითადი ფუნქციაა, მომხმარებელთა საჩივრების განხილვა სატელეკომუნიკაციო სფეროში. ისეთ მომსახურებებთან დაკავშირებით, როგორც არის ინტერნეტ-მომსახურება, სატელეფონო მომსახურება და მაუწყებლობის ტრანზიტით მომსახურება.
მომართვიანობა ყველაზე მაღალი გასულ წელს იყო, საჩივრები ძირითადად ინტერნეტ-მომსახურების ხარვეზებს ეხებოდა. სწორედ ამ საკითხს დაეთმო საჩივრების 51%. ზოგადად საჩივრების და მომართვიანობის სტატისტიკა ყოველწლიურად იზრდება. 2018 წელს ჩვენს სამსახურში 413 განცხადება-საჩივარი შემოვიდა, 2019 წელს 714, ხოლო 2020 წელს 822 განცხადება-საჩივარი შემოვიდა.
ეს მონაცემები მიგვანიშნებს, რომ საზოგადოებაში ერთის მხრივ იზრდება ნდობა ჩვენი სამსახურის მიმართ, მეორეს მხრივ კი ცნობადობა. ჩვენ ბოლომდე ორიენტირებული ვართ მომხმარებლის ინტერესების დაკმაყოფილებაზე და ვცდილობთ მოლაპარაკება-მედიაციის ფარგლებში მოვაგვაროთ ის საკითხები, რომლებზეც მოგვმართავენ მოქალაქეები. საქმის წარმოების ფარგლებში, სამსახურის მხრიდან გაიცემა რეკომენდაციები იმ შემთხვევაში კი, თუ ჩვენი მედიაცია აღმოჩნდება უშედეგო და მომხმარებელს ვერ მოვუგვარებთ პრობლემას, კომუნიკაციების ომბუდსმენი, მიმართავს კომუნიკაციების კომისიას და სთხოვს შესაბამისი საქმის წარმოების დაწყებას. ამ შემთხვევაში კომუნიკაციების ომბუდსმენი მომხმარებლის მხარეს წარმოადგენს ამ დავაში.
ვთვლით, რომ რიცხვები, რომლებიც არსებობს, არ ასახავს ბაზრის რეალობას სრულად. ამიტომ ვაწარმოებთ საინფორმაციო კამპანიას როგორც ჩვენი სამსახურის ცნობადობის გაზრდის, ასევე მომხმარებელში ცნობიერების ამაღლების კუთხით“,-განაცხადა მიროტაძემ ,,საქმეში“.
