"ჯანმრთელობის მსოფლიო ორგანიზაციის დასტურის შემდეგ, ჩვენც შესაძლოა, 12 წლის ასაკის ზემოთ დავიწყოთ ვაქცინაცია"

დაავადებათა კონტროლის ეროვნული ცენტრის ხელმძღვანელის, ამირან გამყრელიძის განცხადებით, კონკრეტულ ვაქცინებზე ასაკობრივი შეზღუდვა აღარ იქნება და ნებისმიერი მათგანის გამოყენება უკვე 18 წლის ზემოთ დასაშვები იქნება.

ამასთან, გამყრელიძის თქმით, კორონავირუსის საწინააღმდეგო აცრის გამოყენება შესაძლოა, 12 წლის ასაკის ზემოთაც დაიწყონ, თუკი, მარეგულირებლები აღნიშნულის ნებართვას გასცემენ.

„ახლა უკვე შეზღუდვა აღარ იქნება, ნებისმიერი ვაქცინა იქნება 18 წლის ზემოთ ყველასთვის. იმ ვაქცინებზე, რომელზეც დაიშვება დაბალი ასაკი, შესაბამისად, საქართველოც მიიღებს გადაწყვეტილებას. იცით, რომ ბავშვებში ჯერჯერობით, ამერიკის საკვებისა და მედიკამენტების სააგენტომ 12 წლის ზემოთ დაუშვეს „ფაიზერის“ გამოყენება. დაიწყო შტატებმა, კანადამ, სამი დღის წინ ჩაერთო იტალიაც და კიდევ რამდენიმე ქვეყანა. ამაზე მიმდინარეობს მსჯელობა. როცა ჯანმრთელობის მსოფლიო ორგანიზაცია მისცემს დასტურს, რა თქმა უნდა, მერე ჩვენც შესაძლოა, 12 წლის ასაკის ზემოთ დავიწყოთ გამოყენება. ასევე, შესაბამისი კვლევები მიდის12 წლის ასაკის ზემოთ ჩინურ ვაქცინებზე, ასევე, „ასტრაზენეკაზე“ და „მოდერნაზეც“. თუ რა თქმა უნდა, მარეგულირებლები მისცემენ დასტურს, საქართველოც შესაბამისად გადავა, რადგან მოგეხსენებათ, ბავშვებში ინფექცია შედარებით მსუბუქად მიდის, მაგრამ ისინი აქტიური გამავრცელებლები არიან“, - განაცხადა გამყრელიძემ.