Tesla ბიტკოინს დაუბრუნდება, თუკი მისი მოპოვება ეკოლოგიურად სუფთა გახდება
ამერიკული კორპორაცია Tesla საკუთარი ნაწარმის ბიტკოინებზე გაყიდვას მას შემდეგ განაახლებს, რაც ამ კრიპტოვალუტას ეკოლოგიურად სუფთა ენერგიის წყაროთი მოიპოვებენ. ამის შესახებ ილონ მასკმა Twitter-ის მიკრობლოგში დაწერა.
მასკის თქმით, კრიპტოვალუტის გენერაციისთვის ეკოლოგიურად სუფთა წყაროებიდან ენერგიის, მინიმუმ, 50%-ს მაინც უნდა იღებდნენ.
მასკი წერს, რომ კომპანიამ ბიტკოინის აქტივების 10% გაყიდა, რათა დაედასტურებინა, თუ რამდენად ადვილია მისი გაყიდვა ბაზარზე რყევების გარეშე.
წლის დასაწყისში ცნობილი გახდა, რომ Tesla-მ 1,5 მილიარდი დოლარის ბიტკოინი შეიძინა და ამ ვალუტის ფულადი ანაზღაურების სახით მიღებას იწყებდა. თუმცა მაისში კომპანიამ ბიტკოინის არაეკოლოგიური გზით მოპოვების მიზეზით ამ კრიპტოვალუტის ტრანზაქცია შეწყვიტა.
