თურქეთში, „კომენდანტის საათი“ უქმდება, კაფეებსა და რესტორნებში მომხმარებლების რაოდენობაზე შეზღუდვა იხსნება
თურქეთში, 1-ელი ივლისიდან კორონავირუსის გამო დაწესებული შეზღუდვები მსუბუქდება.
ადგილობრივი მედიის ინფორმაციით, „კომენდანტის საათი“ უქმდება, კაფეებსა და რესტორნებში მომხმარებლების რაოდენობაზე დაწესებული შეზღუდვა როგორც ღია, ასევე დახურულ სივრცეში იხსნება, პანდემიის გამო დახურული სამუშაო ადგილები და კინოთეატრები ხელახლა იხსნება.
ამასთან, ღია სივრცეში საქორწილო ცერემონიალების გამართვა სტუმრების რაოდენობის შეზღუდვის გარეშე იქნება შესაძლებელი, თუმცა, შიდა ცერემონიებისთვის გარკვეული შეზღუდვები კვლავ იმოქმედებს.
დაიშვება კონცერტები და ფესტივალები, თუმცა მხოლოდ დადგენილი წესების დაცვით.
პარკები, ბაღები, საპიკნიკე ადგილები და ბანაკები საზოგადოებისთვის გაიღება.
თურქეთის ხელისუფლებამ შეზღუდვების შემსუბუქების გადაწყვეტილება დაინფიცირების შემთხვევების მნიშვნელოვანი კლების გამო მიიღო.