რუსი ჰაკერები დაშიფრული მონაცემების აღსადგენად 70 მლნ დოლარს ითხოვენ
ჰაკერებმა, რომლებიც ეჭვმიტანილი არიან პარასკევს განხორციელებულ მასობრივ კიბერთავდასხმაში, გუშინ, გვიან ღამით დაშიფრული მონაცემების აღსადგენად 70 მლნ დოლარის გამოსასყიდი მოითხოვეს. ინფორმაცია ე.წ. ბნელ ვებგვერდზე გავრცელდა, რომელსაც სააგენტო Reuters-ი ეყრდნობა.
მოთხოვნა განთავსდა ბლოგზე, რომელსაც, როგორც წესი, კიბერდანაშაულებრივი ბანდა REvil იყენებს. ეს რუსეთთან დაკავშირებული, ნომერ პირველი კიბერ-გამომძალველი ჯგუფია.
ბანდას აქვს შვილობილი სტრუქტურა, რაც ზოგჯერ ართულებს იმის გარკვევას, თუ ვინ ლაპარაკობს ჰაკერების სახელით. თუმცა, კიბერუსაფრთხოების ფირმა Recorded Future-ის წარმომადგენლის, ალან ლისკას თქმით, ბოლო შეტყობინება „თითქმის უტყუარად“ REvil-ის მმართველ რგოლს ეკუთვნის.
REvil-ის ბანდა მაიამიში დაფუძნებულ ინფორმაციული ტექნოლოგიების ფირმა Kaseya-ში შეიჭრა და ასობით კორპორატიული კლიენტისთვის მისი წვდომა დაარღვია, რის შედეგადაც ჯაჭვური რეაქცია დაიწყო და მთელ მსოფლიოში ათასობით კომპიუტერი პარალიზებული გახდა.
Kaseya-ს წარმომადგენელმა განაცხადა, რომ კომპანიამ გამოსასყიდის შესახებ იცოდა.
აშშ-ს პრეზიდენტ ჯო ბაიდენმა შაბათს გასცა განკარგულება, რომ სპეცსამსახურებმა გამოიძიონ, თუ ვინ დგას გლობალური ჰაკერული თავდასხმის უკან. გამძიებას FBI და აშშ-ს კიბერუსაფრთხოებისა და ინფრასტრუქტურის უსაფრთხოების სააგენტო ატარებენ.
„თუ ეს რუსეთის ორგანიზებით ან გავლენით არის გაკეთებული, აშშ შესაბამისად უპასუხებს და მე ამის შესახებ პუტინი ჟენევაში გავაფრთხილე,“ - განაცხადა კებერთავდასხმიდან მეორე დღეს, ჯო ბაიდენმა.
კიბერუსაფრთხოების ფირმა Huntress Labs ერთ-ერთი პირველი იყო, ვინც მომხდარში თავიდანვე რუსულ კიბერჯგუფი Revil-ს ადანაშაულებდა.
მოამზადა ლადო სულაბერიძემ