სტიქიის შედეგად დაზიანებული გზების აღდგენა დაიწყო - გზების დეპარტამენტი მოუწოდებს საქართველოს მოქალაქეებს და ტურისტებს, აღნიშნული მიმართულებებით გადაადგილებისაგან თავი შეიკავონ და დაწესებულ რეჟიმებს დაემორჩილონ
საავტომობილო გზების დეპარტამენტმა ძლიერი წვიმის შედეგად განვითარებული სტიქიის გამო დაზიანებული გზების აღდგენითი სამუშაოები დაიწყო. ამის შესახებ ინფორმაციას საავტომობილი გზების დეპარტამენტი ავრცელებს.
მათი ინფორმაციით, ძლიერი წვიმის შედეგად, ქუთაისი (წყალტუბოს გადასახვევი)-წყალტუბო-ცაგერი-ლენტეხი-ლასდილის საავტომობილო გზის მონაკვეთზე - სოფელ საყდართან, ადიდებულმა მდინარემ დააზიანა ხიდი და საავტომობილო გზა. ასევე, ძლიერი წვიმის შედეგად, შიდასახელმწიფოებრივი მნიშვნელობის (ზუგდიდი-ჯვარი-მესტია-ლასდილის საავტომობილო გზის კმ165 მონაკვეთზე (კალა-იფარი) მდინარე ენგურმა რკინა-ბეტონის ხიდს გამოურეცხა მარცხენა ბურჯი. ორივე მონაკვეთზე დილიდან აიკრძალა ყველა სახის ავტოტრანსპორტის მოძრაობა და დაზიანებული საგზაო ინფრასტრუქტურის უმოკლეს ვადებში აღდგენისათვის ჩასატარებელი სამუშაოების განსაზღვრის მიზნით, საავტომობილო გზების დეპარტამენტის წარმომადგენლები დილიდან ადგილზე ეცნობოდნენ მდგომარეობას.
ამასთან, საავტომობილო გზების დეპარტამენტი, მძიმე ტექნიკის საშუალებით, აწარმოებს აქტიურ გაწმენდით და დროებითი გზების მოსაწყობად საჭირო სამუშაოებს, სტიქიის მიერ მიყენებული ზიანის აღმოსაფხვრელად და საავტომობილო მიმოსვლის უმოკლეს ვადებში აღსადგენად, მიმდინარეობს დამატებითი ტექნიკის მობილიზებაც.
საავტომობილო გზების დეპარტამენტი მოუწოდებს როგორც საქართველოს მოქალაქეებს, ისე ტურისტებს თავი შეიკავონ ამ მიმართულებებით გადაადგილებისაგან და დაემორჩილონ გზაზე დაწესებულ რეჟიმებს.
ამ დროისათვის საავტომობილო მიმოსვლა ორივე მიმართულებით კვლავ აკრძალულია.