საქართველოში 2022 წლიდან უმუშევრობის დონე შემცირდება - სებ-ი

საქართველოში 2022 წლიდან უმუშევრობის დონე შემცირდება - ამის შესახებ ეროვნული ბანკის მაკროეკონომიკური პროგნოზების განახლებულ დოკუმენტშია აღნიშნული.

დოკუმენტში აღნიშნულია, რომ საბაზისო სცენარის მიხედვით 2022 წლიდან ქვეყანაში პანდემიასთან დაკავშირებული გაურკვევლობები შემცირდება, რის შედეგადაც განახლდება ეკონომიკური აქტივობა. ეკონომიკური აქტივობის ზრდა კი უფრო მეტი საქონლისა და მომსახურების შექმნას გულისხმობს, რასაც, ცხადია მეტი სამუშაო ძალა დასჭირდება, ეს კი უმუშევრობის დონეს შეამცირებს. ეროვნული ბანკი იმასაც აღნიშნავს, რომ უმუშევრობის შემცირების ტემპი თავდაპირველად დაბალი იქნება, რადგან გაჯანსაღების ტენდენცია სამუშაო ძალის მაღალი ინტენსივობის მქონე სექტორებში შედარებით ნელი იქნება. სავარაუდოა, რომ მოცემულ სექტორებში დიდწილად ტურიზმის სექტორი იყოს მოსაზრებული.

რაც შეეხება პესიმისტურ სცენარს. მოცემული სცენარის მიხედვით, COVID-19 -ის შეკავება 2022 წლის მეორე ნახევრამდე ვერ მოხერხდება. მოცემული გაურკვევლობის ფონზე კი ეკონომიკის პოტენციალის გამოყენება და შესაბამისად, ბიზნეს აქტივობის განახლება შენელებული იქნება. იმ შემთხვევაში თუ მოვლენები ასე განვითარდა, მაშინ უმუშევრობა მნიშვნელოვნად გაიზრდება, ხოლო შინამეურნეობებს კომპანიებთან ერთად ვალის გასტუმრების პრობლემაც შეექმნებათ.

ნოდარ სირბილაძე