1700%-ით გაზრდილი იმპორტი - ქვეყნები, საიდანაც ჟანგბადს ვყიდულობთ

საქართველოში ჟანგბადის იმპორტი, მიმდინარე წლის 7 თვეში (იანვარ-ივლისი), გასული წლის ანალოგიურ პერიოდთან შედარებით, 1700%-ით გაიზარდა. საქსტატის მონაცემების მიხედვით, 2020 წლის იანვარ-ივლისში საქართველომ 17.02 ათასი აშშ დოლარის ჟანგბადი შეიძინა, 2021 წლის ანალოგიურ პერიოდში კი - 307.60 ათასი აშშ დოლარის.

„ბიზნესპრესნიუსი“ დაინტერესდა იმ ქვეყნების ჩამონათვალით, საიდანაც 2021 წლის 7 თვეში, საქართველომ ჟანგბადი შეიძინა:

  • თურქეთი - 233.84 ათასი აშშ დოლარი
  • აზერბაიჯანი - 50.61 ათასი აშშ დოლარი
  • რუსეთი - 22.95 ათასი აშშ დოლარი
  • იტალია - 0.20 ათასი აშშ დოლარი

ცნობისთვის, როგორც ჯანდაცვის მინისტრის მოადგილემ თამარ გაბუნიამ განაცხადა, ჟანგბადის მოწოდებისა და მოხმარების ინტენსივობა ძალიან გაზრდილია. მისი თქმით, მოთხოვნის დასაკმაყოფილებლად ეკონომიკის სამინისტრო მუშაობს და სხვადასხვა ქვეყნიდან ხდება ჟანგბადის იმპორტი.

„მიუხედავად იმისა, რომ ყველა უწყება მაღალი დატვირთვით მუშაობს, ჯერჯერობით კლინიკებს ჟანგბადის მიწოდებასთან დაკავშირებული პრობლემა არ შექმნიათ. ჩვენ მათ ვთხოვეთ, რომ ჟანგბადის რაციონალური მოხმარების რეკომენდაციები გამოიყენონ, რასაც ჯანმრთელობის მსოფლიო ორგანიზაცია გასცემს, ვინაიდან იყო შემთხვევები, როდესაც ჟანგბადის სისტემა იყო გახსნილი, ჟანგბადი იკარგებოდა და პაციენტი მას ვერ იყენებდა. იმისათვის, რომ მსგავსი ხარვეზები აღმოიფხვრას, ჩვენ მუდმივად ვუკავშირდებით კლინიკებს“, - განაცხადა თამარ გაბუნიამ.

ნინი ქეთელაური