იაპონიის ელჩი - ენერგოუსაფრთხოება და ენერგოდამოუკიდებლობა ძალიან მნიშვნელოვანია, რადგან დიდ გავლენას ახდენს ეკონომიკასა და ადამიანების ცხოვრებაზე

ენერგოუსაფრთხოება და ენერგოდამოუკიდებლობა ძალიან მნიშვნელოვანია იაპონიისთვის, ისევე, როგორც ნებისმიერი სხვა ქვეყნისთვის, რადგან იგი დიდ გავლენას ახდენს ეკონომიკასა და ადამიანების ცხოვრებაზე, - ამის შესახებ იაპონიის საგანგებო და სრულუფლებიანმა ელჩმა საქართველოში იმამურა აკირამ პლატფორმა „ენერგომომავალისთვის“ მიცემულ ინტერვიუში განაცხადა.

მისი განმარტებით, უცხოურ ენერგორესურსებზე იაპონიის დამოკიდებულება 90%-ს აღწევდა, რაც ქვეყანას ძალიან ძვირი უჯდებოდა. ელჩმა ხაზგასმით აღნიშნა ის წვლილი, რომელიც იაპონიის ენერგოსისტემაში ჰიდროელექტროსადგურებს მიუძღვის და განმარტა, თუ რა მიდგომებს იყენებს სახელმწიფო ახალი ჰესებისა თუ სხვა ტიპის ელექტროსადგურების მშენებლობისას.

„იაპონიისთვის უმნიშვნელოვანესია ჰიდროელექტროსადგურების არსებობა: საკუთარი რესურსებით ელექტროენერგიის წარმოების უდიდესი ნაწილი ხომ სწორედ ჰიდროსადგურებზე მოდის და ალბათ, ასე იქნება მომდევნო წლებშიც. ჰიდროელექტროსადგურები იმ ადგილებშიც შენდება, სადაც სეისმოლოგიური რისკები შეიძლება, არსებობდეს. რასაკვირველია, უამრავ კვლევას ვატარებთ სეისმოაქტივობის შესასწავლად. ასევე, ვამყარებთ კომუნიკაციას საზოგადოებასთან, რათა მივაღწიოთ კონსენსუსს იმის თაობაზე, რამდენად უსაფრთხოა სადგურების მშენებლობა და რამდენად გამართლებულია საზოგადოების წუხილი ბუნებრივ და სოციალურ გარემოზე ზემოქმედებასთან დაკავშირებით. ეს კომუნიკაცია ნებისმიერი ჰესის ან სხვა ტიპის ელექტროსადგურის მშენებლობის პროცესის ძალზე მნიშვნელოვანი ნაწილია“, – აღნიშნა ელჩმა.

იმამურა აკირას განცხადებით, საქართველოს დიდი ჰიდროენერგეტიკული პოტენციალი აქვს, რომელსაც იაპონია ინტერესით აკვირდება და ამ მიმართულებით უკვე პირველი ინვესტიციაც განახორციელა.

„ვფიქრობ, მისი ლანდშაფტიდან გამომდინარე, საქართველოს უზარმაზარი ჰიდროენერგეტიკული პოტენციალი აქვს, რაც გენერაციის გაზრდის საშუალებას იძლევა. იაპონია დიდი ინტერესით აკვირდება თქვენი ქვეყნის პოტენციალს. სწორედ ამიტომ ჩვენმა ენერგეტიკულმა გიგანტმა TEPCO-მ (Tokyo Electric Power Company) გადაწყვიტა პირველი ინვესტიციის განხორციელება დარიალის ჰიდროელექტროსადგურში “, - განაცხადა იმამურა აკირამ.