ტურიზმის ეროვნულმა ადმინისტრაციამ ყაზახეთის უმსხვილეს ტურ-ოპერატორებს უმასპინძლა
ყაზახეთიდან ტურისტული ნაკადის გაზრდის მიზნით, საქართველოს ეკონომიკისა და მდგრადი განვითარების სამინისტროს ტურიზმის ეროვნულმა ადმინისტრაციამ ყაზახეთის ტურისტული სააგენტოებისა და ავიაკომპანიის „Air Astana“-ს წარმომადგენლებისთვის ინფო-ტური გამართა.
ტურიზმის ეროვნული ადმინისტრაციის ინფორმაციით, გაცნობითი ტური ადმინისტრაციამ ავიაკომპანია „Air Astana“-ს მხარდაჭერითა და აჭარის ტურიზმისა და კურორტების დეპარტამენტის თანაორგანიზებით მოაწყო. ტურში 12 ტურ-ოპერატორი და ავიაკომპანიის წარმომადგენელი მონაწილეობდა. მათივე ცნობით, ინფო-ტურის მიზანი საქართველოს ტურისტული პროდუქტების, კურორტების პოპულარიზაცია, ასევე ყაზახეთის ბაზარზე საქართველოს ტურისტული შესაძლებლობების აქტიური რეკლამირება და საქმიანი ტურიზმის პოტენციალის შესწავლაა.
როგორც ტურიზმის ეროვნულ ადმინისტრაციაში აღნიშნავენ, ერთკვირიანი ინფო-ტურის ფარგლებში ტურ-ოპერატორებმა ბათუმი, აჭარის ტურისტული ადგილები, წყალტუბო, საირმე, ბორჯომი, ბაკურიანი, უფლისციხე, მუხრანი და გუდაური დაათვალიერეს. ტურის ბოლოს თბილისში ქართველი და ყაზახი ტურ-ოპერატორებისთვის B2B ფორმატში სამუშაო შეხვედრა გაიმართა, სადაც ქართული ტურისტული კომპანიების წარმომადგენლებს ყაზახ კოლეგებთან კონტაქტების გაცვლისა და ერთობლივი ტურების დაგეგმვის საშუალება მიეცათ.
როგორც ტურიზმის ეროვნული ადმინისტრაციის საერთაშორისო ტურიზმის სტიმულირების სამმართველოს უფროსმა მარინა ბოჯგუამ განმარტა, ყაზახეთი ტურისტების მოზიდვის კუთხით ერთ-ერთ მნიშვნელოვან მიზნობრივ ბაზარს წარმოადგენს.
„საქართველოს ტურიზმის ეროვნული ადმინისტრაცია ავიაკომპანია „Air Astana-ს“ მხარდაჭერით ატარებს გაცნობით ტურს, სადაც ტურისტული კომპანიის წარმომადგენლები მონაწილეობენ ყაზახეთიდან, ამ ტურის მიზანია ყაზახეთის ბაზარზე საქართველოს ტურისტული რეკლამირება მოხდეს, რაც ხელს შეუწყობს ფართო აუდიტორიის დაინტერესებას“, - განაცხადა მარინა ბოჯგუამ.
როგორც ავიაკომპანია „Air Astana“-ს წარმომადგენელი განმარტავს, მათი სურვილია ზამთრის სეზონზე ტურისტული ნაკადები გაიზარდოს ყაზახეთსა და საქართველოს შორის.
„ყაზახეთიდან 10 ტურ-ოპერატორია საქართველოში ჩამოსული, ისინი ყაზახეთის ყველაზე მსხვილ ტურისტულ კომპანიებს წარმოადგენენ. ჩვენ ტური ბათუმიდან დავიწყეთ, შემდეგ მოვინახულეთ სხვადასხვა ადგილები, სანატორიუმები, ასევე სამთო კურორტები, თბილისში შევხვდით სასტუმროების, ტურისტული კომპანიებისა და საქმიანი ტურიზმი სფეროში ჩართულ პირებს. ჩვენ გვინდა გავზარდოთ ტურისტული ნაკადები ყაზახეთსა და საქართველოს შორის ზამთრის სეზონზე“, - აცხადებს კამილა ჟალაუბაევა.