საბაჟო-გამშვებ პუნქტებზე მგზავრებისთვის საიზოლაციო სივრცეები მოეწყო

ფინანსთა სამინისტროს შემოსავლების სამსახურის საბაჟო-გამშვებ პუნქტ „სადახლო-საავტომობილოზე“ კორონავირუსის და სხვა გადამდები დაავადებების გავრცელების პრევენციის მიზნით, საზღვრის მკვეთი პირებისთვის (COVID-19-ის საეჭვო და დადასტურებულ შემთხვევებში) დროებითი განთავსების საიზოლაციო სივრცე მოეწყო.

ფინანსთა სამინისტროს შემოსავლების სამსახურის ინფორმაციით, აღნიშნული პროექტი (საქართველოში საზღვრისა და მიგრაციის მართვის მდგრადობის უზრუნველყოფა) ევროკავშირის ფინანსური მხარდაჭერითა და ჯანმრთელობის მსოფლიო ორგანიზაციის რეკომენდაციით, მიგრაციის საერთაშორისო ორგანიზაციის მიერ განხორციელდა.

როგორც ფინანსთა სამინისტროს შემოსავლების სამსახურის უფროსის მოადგილემ ვლადიმერ ხუნდაძემ აღნიშნა, მიგრაციის საერთაშორისო ორგანიზაციის დახმარებით, ოთხ დატვირთულ საბაჟო გამშვებ პუნქტზე - ,,თბილისის საერთაშორისო აეროპორტი“, ,,სარფი“, ,,წითელი ხიდი“ და ,,სადახლო-საავტომობილო“ ამოქმედდა დროებითი განთავსების საიზოლაციო სივრცეები, რაც გლობალური პანდემიის გავრცელების პირობებში, მოქალაქეთა ჯანმრთელობის უზრუნველყოფისა და იმავდროულად ლეგიტიმური მიგრაციის ხელშეწყობის მიმართულებით უმნიშვნელოვანესი ნაბიჯია.

“აღსანიშნავია, რომ მიგრაციის საერთაშორისო ორგანიზაციის მიერ, პროექტის - ,,საქართველოში საზღვრის და მიგრაციის მართვის მდგრადობის უზრუნველყოფა“ ფარგლებში, განხორციელდა არაერთი დახმარება, მათ შორის, საბაჟო დეპარტამენტს გადაეცა სამკერდე კამერები, ნარკო-დეტექტორები, რამდენიმე მიმართულებით გადამზადდა არაერთი მებაჟე- ოფიცერი და განხორციელდა მხარდაჭერა საბაჟო რისკების ანალიზის დახვეწის მიმართულებით. კიდევ ერთხელ, მინდა მადლობა გადავუხადო პროექტს მხარდაჭერისთვის და ვიმედოვნებთ ჩვენი ნაყოფიერი, შედეგებზე ორიენტირებული თანამშრომლობა მომავალშიც აქტიურად გაგრძელდება“, - განაცხადა ვლადიმერ ხუნდაძემ.

ფინანსთა სამინისტროს შემოსავლების სამსახურის ინფორმაციით, აღნიშნულ ღონისძიებას ესწრებოდნენ IOM საქართველოს ხელმძღვანელი სანია სელებიჩ ლუკოვაკი და ევროდელეგაციის წარმომადგენელი ჯურატე ჯუოდსნუკიტე, ასევე, ფინანსთა სამინისტროს შემოსავლების სამსახურის საერთაშორისო ურთიერთობათა დეპარტამენტის უფროსი სამსონ ურიდია, საბაჟო დეპარტამენტის უფროსის მოადგილე ელგუჯა ბერანძე და დეპარტამენტის ხელმძღვანელი პირები.