კირბალის და ბერშუეთის სავარგულების სარწყავი წყლით უზრუნველსაყოფად სამუშაოები მიმდინარეობს
საქართველოს სოფლის მეურნეობის სამინისტრო და გაერთიანებული სამელიორაციო სისტემების კომპანია სარწყავი და სადრენაჟე სისტემების რეაბილიტაციას აქტიურად აგრძელებს.
სოფლის მეურნეობის სამინისტროს ინფორმაციით, ზეღდულეთის თემის სოფლების - კირბალის და ბერშუეთის სავარგულების სარწყავი წყლით უზრუნველსაყოფად კომპანია სტაციონალური სატუმბი სადგურების მოწყობის და არხების სარეაბილიტაციო სამუშაოებს ახორციელებს. მიმდინარე სამუშაოები დღეს, კომპანიის დირექტორის მოადგილემ, ირაკლი სირაძემ დაათვალიერა.
პროექტის ფარგლებში, აშენდება ახალი სატუმბი სადგურები, აღდგება მიწის კალაპოტიანი არხების საპროექტო კვეთი, მოეწყობა წყალგამშვები კვანძები. აღნიშნული სამუშაოების შედეგად, სოფელ კირბალისა და ბერშუეთის 200 ჰა სასოფლო სამეურნეო მიწის ფართობი გასარწყავდება, რითაც 200 კომლი ისარგებლებს. სამუშაოები 2014 წლის დასასრულს დაიწყო და 2015 წელს დასრულდება. მისი საპროექტო ღირებულებაა 1 942 700 ლარი.
საქართველოს გაერთიანებული სამელიორაციო სისტემების კომპანია სამელიორაციო სისტემების მოდერნიზაციის ფარგლებში, შიდა ქართლში, ერთდროულად 10 სხვადასხვა სისტემაზე ახორციელებს სარეაბილიტაციო სამუშაოებს.