ვანის რაიონში ახალი სკოლის მშენებლობა დაიწყო

ვანის რაიონში ახალი სკოლის მშენებლობა დაიწყო.

განათლებისა და მეცნიერების სამინისტროს ინფორმაციით, ვანის მუნიციპალიტეტის სოფელ ზედა ვანში 22 წელია სკოლის შენობა არ არსებობს. მოსწავლეებს გაკვეთილები საკრებულოს ყოფილ შენობაში სახელდახელოდ მოწყობილ არასტანდარტულ საკლასო ოთახებში უტარდებათ. საქართველოს განათლებისა და მეცნიერების სამინისტროს გადაწყვეტილებით, გასული წლის დეკემბერში სოფელ ზედა ვანში თანამედროვე, ორსართულიანი სკოლის მშენებლობა დაიწყო. მშენებლობის მიმდინარეობას მინისტრი თამარ სანიკიძე ადგილობრივი თვითმმართველობის წარმომადგენლებთან ერთად გაეცო და მოსახლეობასაც შეხვდა.

სამინისტროს ცნობით, სოფელ ზედა ვანის მოსახლეობა ახალი სკოლის მშენებლობაზე დაპირებას 90-იანი წლებიდან იღებდა, მაგრამ რეალურად, მშენებლობა 2014 წლამდე არ დაწყებულა. იმის გამო, რომ მოსწავლეებს გაუსაძლის პირობებში უწევდათ სწავლა და თაობები იზრდებოდა არაჯანსაღ, სრულიად შეუფერებელ გარემოში, ოჯახები ტოვებდა სოფელს, შედეგად, მოსწავლეთა რაოდენობა 200-დან 130 ბავშვამდე შემცირდა.

მათივე ინფორმაციით, 2014 წლის 18 დეკემბერს სკოლის მშენებლობა დაიწყო და სწრაფ ტემპში მიმდინარეობს. ხელშეკრულების ვადიდან და სამშენებლო რიტმიდან გამომდინარე, სოფელ ზედა ვანში ახალი სასწავლო წლისთვის უკვე იქნება თანამედროვე სტანდარტების ახალი ორსართულიანი სკოლის შენობა, რომელიც 200 მოსწავლეზეა გათვლილი.